İQTİSADİYYAT
SOCAR-ın idarə və müəssisələrində əməyin mühafizəsinə xüsusi önəm verilir
Bakı, 30 aprel, AZƏRTAC
SOCAR-ın idarə və müəssisələrində Ümumdünya Əməyin Mühafizəsi günü qeyd olunub.
Şirkətin mətbuat xidmətindən AZƏRTAC-a bildirilib ki, bu münasibətlə keçirilən tədbirlərdə sağlam və təhlükəsiz iş şəraitinin təmin olunması, habelə işçilərin əmək prosesində təhlükəsizlik qaydalarına düzgün əməl etməsi ilə bağlı müvafiq təlimatlandırma işləri aparılıb.
"Azərikimya" İstehsalat Birliyində idarə və müəssisə rəhbərlərinin, istehsalat və sahə rəislərinin, əməyin mühafizəsi və təhlükəsizlik texnikası üzrə mütəxəssislərin iştirakı ilə keçirilən geniş tədbirdə birliyin icraçı direktorunun əməyin mühafizəsi, ətraf mühitin qorunması üzrə müavini Vüqar Kərimov bu istiqamətdə görülən işlər barədə məlumat verib. Qeyd olunub ki, ötən dövr ərzində birliyin müəssisələrində mühəndis-texniki işçilər və fəhlələr arasında geniş maarifləndirmə işi aparılıb və bu öz bəhrəsini verməkdədir.
“EP-300” qurğusunda 2016-2019-cu illəri əhatə edən modernləşdirilmə və yeni qurğuların tikintisi işlərinin icrası ilə əlaqədar layihəyə cəlb olunmuş “SOCAR-KBR” birgə müəssisəsinin təhlükəsizlik üzrə meneceri Maykl Edqardın yeni layihələrin icrası zamanı təhlükəsizlik qaydalarına əməl olunmasına dair təqdimatı maraqla qarşılanıb.
Sonda “Etilen-Polietilen” zavodunun və təmir-tikinti idarəsinin əməyin mühafizəsi işində fərqlənən 10 əməkdaşına “Azərikimya” İB-nin Həmkarlar İttifaqı Komitəsinin diplom və mükafatları təqdim edilib.
“Azneft” İstehsalat Birliyində keçirilmiş seminarda baş direktorun əməyin mühafizəsi üzrə müavini Cəlair Səmədov diqqəti istehsalatda bədbəxt hadisələrin, peşə xəstəliklərinin qarşısının alınmasına, sağlam və təhlükəsiz əmək şəraitinin yaradılmasına yönəldib. Daha sonra “Azneft” İB-nin bu sahədəki təcrübəsindən, müvafiq normativ-texniki bazanın yaradılması, beynəlxalq idarəetmə sistemlərinin tətbiqi, nəzarət tədbirlərinin gücləndirilməsi sahəsində görülən işlərdən söhbət açılıb.
Heydər Əliyev adına Bakı Dərin Özüllər Zavodunda keçirilmiş tədbirdə müəssisənin direktoru Roman Nağıyev istehsalat sahələrində əməyin mühafizəsi işinin təkmilləşdirilməsi, iş prosesində peşə xəstəliklərinin yaranmasına səbəb ola biləcək zərərli və təhlükəli amillərin aradan qaldırılması üzrə mütəmadi tədbirlər həyata keçirildiyini söyləyib. Bildirilib ki, bütün xidmət sahələrində təhlükəsiz və ekoloji cəhətdən sağlam iş şəraiti yaradılması daim diqqət mərkəzində saxlanılır. Tədbirdə əməyin mühafizəsi ilə bağlı geniş müzakirə aparılıb, müvafiq tapşırıqlar verilib.