AZƏRTAC xəbər verir ki, Ağsuda 31 Mart - Azərbaycanlıların soyqırımı günü ilə əlaqədar anma mərasimi keçirilmişdir. Mərasim iştirakçıları Qarabağ müharibəsində şəhid olmuş ağsuluların xatirəsinə şəhərin mərkəzi meydanında ucaldılan xatirə kompleksini ziyarət edərək, əklillər qoymuşlar.

Sonra soyqırımı qurbanlarının, şəhidlərin xatirəsi birdəqiqəlik sükutla yad edilmişdir.

Mərasimdə daşnakların Azərbaycan türklərinə qarşı müxtəlif dövrlərdə yeritdikləri soyqırımı siyasəti ilə bağlı tarixi həqiqətlər bir daha xatırlanmış, xalqımızın tarixinin bu faciəli səhifəsinin ümummilli liderimiz Heydər Əliyevin təşəbbüsü ilə hər il anılmasının böyük siyasi əhəmiyyət kəsb etdiyi vurğulanmışdır. Göstərilmişdir ki, torpaqlarımıza göz dikən qəsbkar ermənilərin xalqımıza qarşı soyqırımı siyasəti bu gün də davam edir, lakin dövlətimizin başçısı İlham Əliyevin torpaqlarımızın azad edilməsi istiqamətində məqsədyönlü və yorulmaz fəaliyyəti hər kəsdə böyük iftixar, qürur hissi doğurur və getdikcə qüdrətlənməkdə olan Azərbaycan ordusunun torpaqlarımızı yağı düşməndən azad edəcəyinə inamı möhkəmləndirir.

Axırda beynəlxalq təşkilatlara müraciət qəbul olunmuşdur.