ELM VƏ TƏHSİL


STEAM layihəsi çərçivəsində təlimlər davam edir

Bakı, 17 noyabr, AZƏRTAC

Bakı Şəhər üzrə Təhsil İdarəsinin (BŞTİ) tabeliyindəki ümumi təhsil müəssisələrinin müəllimləri üçün STEAM layihəsi çərçivəsində təlimlər davam edir.

Bu barədə AZƏRTAC-a BŞTİ-dən məlumat verilib. Bildirilib ki, elm, texnologiya, mühəndislik, incəsənət və riyaziyyatın inteqrativ tədrisi metodikası və robototexnika üzrə keçirilən onlayn təlimlərdə STEAM layihəsi tətbiq olunan və 2021-2022-ci tədris ilində layihənin tətbiqi nəzərdə tutulan məktəblərin müəllimləri iştirak edir.

Təlimlərin əsas məqsədi STEAM dərslərini tədris edəcək müəllimləri müvafiq istiqamətdə peşəkar inkişafa sövq etmək, onlarda XXI əsr bacarıqlarının - yaradıcı və bədii düşüncə, əməkdaşlıqetmə, həmçinin ünsiyyətin inkişaf etdirilməsi, müxtəlif proqramlaşdırma dillərini tətbiq etməklə innovativ texnologiyalardan istifadə qabiliyyətinin yüksəldilməsindən ibarətdir. Təlimlər çərçivəsində müəllimlərə STEAM düşüncəsi və metodikası, fənlərarası əlaqə, layihə əsaslı öyrənmə, innovativ təlim metodikaları və digər bu kimi istiqamətlərdə praktik biliklər verilir. Həmçinin müəllimlər STEAM dərslərində istifadə olunan müasir avadanlıqlarla tanış olur, müxtəlif tapşırıqlar yerinə yetirərək yeni cihazların iş prinsipi və müxtəlif layihələrdə tətbiqi üsullarını öyrənirlər.

Təlimlərdə müəllimlərə “STEAM metodologiyaları”, “Bir platalı platformalarda kodlaşdırma”, “Rəqəmsal incəsənət”, “3D modelləşdirmə”, “Mühəndislik modulları”, “Aerodinamika və uçan aparatlar”, “Robototexnika”, “Nanotexnologiya və biotexnologiya” ilə bağlı geniş məlumat verilir, mövzu ətrafında fikir mübadiləsi aparılır, iştirakçıları maraqlandıran suallara aydınlıq gətirilir.

Qeyd edək ki, Heydər Əliyev Fondunun dəstəyi ilə Təhsil Nazirliyi tərəfindən reallaşdırılan STEAM layihəsinin məqsədi müasir təhsil çağırışları əsasında inkişaf etmiş ölkələrdə tətbiq edilən təhsil yeniliklərinin ölkəmizdə tətbiqi imkanlarının öyrənilməsi və öyrədilməsindən ibarətdir. STEAM beş sahənin – elm, texnologiya, mühəndislik, incəsənət və riyaziyyatın birgə və inteqrasiya olunmuş tədrisi ideyası üzərində qurulub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.