MƏDƏNİYYƏT
SÜLEYMAN RÜSTƏMİN 100 İLLİK YUBİLEYİ İLƏ ƏLAQƏDAR XATİRƏ GECƏSİ KEÇİRİLMİŞDİR
Şair Oqtay Rza, yazıçı Sabir Nəbioğlu və başqaları nikbin ruhlu şair S.Rüstəmin Azərbaycan ədəbiyyatına klassik poeziya ənənələrimizin parlaq davamçısı kimi daxil olduğunu bildirmişlər. Prezident İlham Əliyevin böyük şairin 100 illik yubileyi ilə əlaqədar fevralın 6-da imzaladığı Sərəncam onun yaradıcılığına dövlət qayğısı kimi dəyərləndirilmişdir.
Çıxış edənlər xalq şairinin həyat və yaradıcılığı ilə bağlı ürək sözlərini söyləmiş, xatirələrini danışmışlar. Ümummilli lider Heydər Əliyevin S.Rüstəmə daim diqqət və qayğı ilə yanaşdığı vurğulanmış, sənət aləminin çox nüfuzlu simalarından biri olmuş şairin ictimai-siyasi xadim kimi də tanındığı, uzun müddət keçmiş Azərbaycan SSR Ali Sovetinin sədri olduğu qeyd edilmişdir. S.Rüstəmin yaradıcılığında mühüm yer tutan Cənub şeirlərinin XX əsr Azərbaycan poeziyasının incilərindən sayıldığı, xatirəsinin qədirbilən xalqımızın qəlbində daim yaşayacağı bildirilmişdir.
Mərasimdə S.Rüstəmin sözlərinə bəstələnmiş mahnılar səslənmiş, şeirləri söylənmiş və ədəbi-bədii kompozisiya göstərilmişdir.