AZƏRTAC xəbər verir ki, aprelin 14-də Sumqayıt Şəhər İcra Hakimiyyətində Prezident İlham Əliyevin Nazirlər Kabinetinin 2007-ci ilin birinci rübündə Azərbaycanın sosial-iqtisadi inkişafının yekunlarına həsr olunmuş iclasındakı nitqlərindən irəli gələn vəzifələr müzakirə olunmuşdur.

Müşavirəni açan icra hakimiyyətinin başçısı Vaqif Əliyev bildirmişdir ki, Azərbaycanın sürətli inkişafının əsasını onun iqtisadiyyatının dinamik yüksəlişi təşkil edir. 2005-ci ildə ÜDM 26 faiz, 2006-cı ildə 35 faiz, cari ilin üç ayı ərzində bu göstərici 40 faizədək artmışdır. O, dövlətimizin başçısının çıxışına istinadla demişdir ki, respublikada, demək olar, bütün göstəricilər üzrə intensiv artım müşahidə olunur. Zaman ümummilli liderimiz Heydər Əliyevin yaratdığı dövlət quruculuğu strategiyası və konsepsiyasının misilsizliyini sübuta yetirmişdir. Dövlətimizin başçısı İlham Əliyev çevik və müdrik siyasətçi bacarığı nümayiş etdirərək, daxili və xarici siyasətdə dahi liderimizin xəttini uğurla həyata keçirir. O vurğulamışdır ki, ölkə Prezidentinin nitqini dinləyən hər kəsin qəlbi yüksək fəxarət, gələcəyə inam hissi ilə dolmuşdur.

Müşavirədə çıxış edən şəhərin müxtəlif qurumlarının, idarə və təşkilatlarının rəhbərləri bildirmişlər ki, birinci rübün yekunlarına görə sənayedə çalışanların sayı xeyli artmış, orta əmək haqqı 160 manatdan çox olmuşdur. “Azərboru” ASC-də istehsalın həcmi təxminən 8 dəfə, tikintidə isə iki dəfə artmışdır. Regionların sosial-iqtisadi inkişafına dair Dövlət proqramına Sumqayıtla bağlı daxil edilən 11 bəndin hamısı uğurla yerinə yetirilir.

Lakin “Azərikimya” dövlət şirkətinin 4 iri zavodu 3 ay ərzində işləməmişdir. Burada istehsalın ümumi həcmi cəmi 26 faiz olmuş, 11 milyon manatlıq məhsul istehsal edilmişdir. Halbuki, ötən ilin müvafiq dövrü ərzində 42 milyon manatlıq məhsul istehsal olunmuşdu.

517 meqavat gücündə Sumqayıt elektrik stansiyasının, “Azəralüminium” ASC-nin Sumqayıt sahəsində daha iki korpusun tikintisi başa çatdırılır. “Bismak” iri ərzaq kompleksi, “Azkompozit” şüşə lifli boru zavodu, “Dizaynqrup”, “Basf” plastik boru zavodu və digər müəssisələr artıq məhsul buraxır.

Təkcə 2007-ci ilin birinci rübü ərzində şəhərdə 1600 iş yeri, o cümlədən 800 daimi iş yeri açılmışdır. Heydər Əliyev Fondunun təşəbbüsü ilə həyata keçirilən “Hərəyə bir ağac əkək!” humanitar aksiyası çərçivəsində şəhərdə 15 minə yaxın ağac və bəzək kolu əkilmişdir.

Sonda sahibkarlığın inkişafı üçün əlverişli şərait yaradılmasına, dövlətimizin başçısı İlham Əliyevin qarşıya qoyduğu vəzifələrin yerinə yetirilməsinə dair konkret tapşırıqlar verilmişdir.