İQTİSADİYYAT
SUMQAYITIN KİMYA SƏNAYESİ DİQQƏT MƏRKƏZİNDƏDİR
AZƏRTAC-ın müxbiri xəbər verir ki, konfrans Sumqayıt İcra Hakimiyyətinin təşəbbüsü ilə artıq ikinci ildir keçirilir. Tədbirdən məqsəd real vəziyyəti təhlil etmək, aktual problemləri müzakirə etmək, tövsiyələr, işgüzar təkliflər hazırlamaq, kimya sənayesinin inkişaf strategiyasını planlaşdırmaq, Sumqayıtın neft-kimya kompleksini işə salmaqdır.
Konfransın əvvəlində iştirakçılar ümummilli liderimiz Heydər Əliyevin şəhərin mərkəzində ucaldılmış abidəsi önünə çiçək dəstələri qoymuşlar.
Sumqayıt İcra Hakimiyyətinin başçısı Vaqif Əliyev konfrans iştirakçılarını və qonaqlarını salamlayaraq, şəhərin sosial-iqtisadi vəziyyətini elmi əsaslarla səciyyələndirmiş, onun inkişafında kimya sənayesinin rolundan danışmışdır.
O demişdir ki, Azərbaycan xalqının ümummilli lideri ölkənin kimya sənayesinin inkişafına misilsiz töhfələr vermişdir. Onun 1998-ci ildə Yaponiyaya səfəri zamanı Sumqayıt etilen-polietilen zavodunda modernləşdirilmiş buxar-qaz generatorunun tikintisi üçün dövlət zəmanəti ilə kredit ayrılması barədə razılıq əldə edilmişdi.
Qeyd olunmuşdur ki, ulu öndərimizin işləyib hazırladığı neft strategiyasının həyata keçirilməsinin nəticələri iqtisadi göstəricilərdə və əhalinin rifahında özünü göstərir. İqtisadiyyatın sürətli inkişafı, dahi liderimizin layiqli davamçısı Prezident İlham Əliyevin məqsədyönlü islahatları uğurla həyata keçirməsi, makroiqtisadi sabitliyi, ölkənin regionda öncül mövqelərini təmin etmişdir ki, bu da Azərbaycanın dünya iqtisadi məkanına fəal inteqrasiyasına imkan yaratmışdır.
Konfrans iştirakçıları kimya sənayesinin müxtəlif problemlərini və inkişaf perspektivlərini əhatə edən 30-a yaxın məruzə dinləmişlər. “Azərkimya” Dövlət Konserninin prezidenti, Milli Məclisin deputatı Fikrət Sadıqovun, Milli Elmlər Akademiyasının müxbir üzvləri Ayaz Əfəndiyevin, Vaqif Fərzəliyevin, Mustafa Salahovun, Akif Əzizov və Fazilə Səmədovanın, İqtisadi İnkişaf Nazirliyi İqtisadi İslahatlar mərkəzinin direktoru Vaqif Rüstəmovun və başqalarının çıxışları xüsusi maraq doğurmuşdur.
Konfrans zamanı alimlər kimya sənayesi strukturunun bazar iqtisadiyyatı tələblərinə uyğun təkmilləşdirilməsi, kadr hazırlığı, marketinq tədqiqatlarından istifadə olunması, qabaqcıl, ekoloji təmiz texnologiyalar və xammal nəzərə alınmaqla yeni istehsalat yaradılması, kiçik kimya müəssisələrinin intensiv inkişafı məsələlərinə dair işgüzar, konstruktiv müzakirələr aparmışlar. İnnovasiya fondunun, eksperimental tədqiqat mərkəzinin yaradılmasına, habelə görkəmli kimyaçı alim Yusif Məmmədəliyevin xatirəsini əbədiləşdirmək məqsədi ilə Sumqayıt Dövlət Universitetinin kimya fakültəsinin tələbələri üçün təqaüd təsis edilməsinə və şəhərin kimya müəssisələrindən birinə onun adının verilməsinə dair təkliflər irəli sürmüşlər.
Sonda konfrans iştirakçıları qətnamə və Azərbaycan Prezidenti İlham Əliyevə müraciət qəbul etmişlər.
Konfrans iştirakçıları və qonaqları sarayın foyesində açılmış sərgidə Sumqayıtın 50-dən çox dövlət və özəl müəssisəsinin nümayiş etdirdiyi məhsullarla, habelə kimyaçı alimlərin referatları və səmərələşdirici ixtiraları ilə tanış olmuşlar.