İDMAN


Sabah şahmat tacı uğrunda dünya çempionatına start veriləcək

Bakı, 25 noyabr, AZƏRTAC

Noyabrın 26-da Birləşmiş Ərəb Əmirliklərinin Dubay şəhərində şahmat tacı uğrunda dünya çempionatına start veriləcək.

AZƏRTAC xəbər verir ki, şahmat tacının hazırkı sahibi norveçli Maqnus Karlsen yarışda Rusiya təmsilçisi Yan Nepomnyaşi ilə mübarizə aparacaq. Yarış 14 matçdan ibarət olacaq. Hesab bərabər olarsa iştirakçılar tay-breykdə oynayacaqlar. Turnir dekabrın 14-dək davam edəcək.

Y.Nepomnyaşi bu il Yekaterinburqda dünya şahmat tacına namizədlərin mübarizə apardıqları iddiaçılar turnirinin qalibi olmaqla şahmat tacı uğrunda dünya çempionatına vəsiqə qazanıb.

Qeyd edək ki, 2019-cu ildə keçirilmiş dünya kubokunun sahibi kimi iddiaçılar turnirinə vəsiqə qazanan Azərbaycan təmsilçisi Teymur Rəcəbovun bu nüfuzlu yarışda iştirakı alınmayıb. Belə ki, şahmatçımızın koronavirusla əlaqədar turnirin təxirə salınması barədə təklifi FIDE tərəfindən qəbul olunmadığından o, iştirakdan imtina etmişdi.

Xatırladaq ki, Maqnus Karlsen 2013-cü ildə Hindistan təmsilçisi Vişvanatan Anand üzərində qələbə qazanaraq dünya şahmat tacına sahib olub. O, 2014-cü ildə Rusiyanın Soçi şəhərində V.Anand, 2016-cı ildə ABŞ-ın Nyu-York şəhərində rusiyalı Sergey Karyakin və iki il sonra isə Böyük Britaniyada ABŞ təmsilçisi Fabiano Karuananı məğlub edərək titulunu qoruyub.

Hazırda Maqnus Karlsen (2855) dünya reytinq cədvəlinə başçılıq edir, Yan Nepomnyaşi (2782) isə beşinci pillədə qərarlaşıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.