CƏMİYYƏT
Sabirabadda “Mənəvi dəyərlərin təbliği və dini icmalar” mövzusunda tədbir keçirilib
Bakı, 7 oktyabr, AZƏRTAC
Oktyabrın 7-də Dini Qurumlarla İş üzrə Dövlət Komitəsinin (DQİDK) İmişli bölgəsi üzrə şöbəsi və Qafqaz Müsəlmanları İdarəsinin (QMİ) Sabirabad rayonu üzrə nümayəndəliyinin birgə təşkilatçılığı ilə “Mənəvi dəyərlərin təbliği və dini icmalar” mövzusunda maarifləndirici tədbir keçirilib.
DQİDK-nın mətbuat xidmətindən AZƏRTAC-a verilən məlumata görə, tədbirdə komitənin İmişli bölgəsi üzrə şöbəsinin əməkdaşları Atakişi Məhərrəmli, Elvin İbrahimov, QMİ-nin Sabirabad rayonu üzrə səlahiyyətli nümayəndəsi Ağakərim Sadıqov, Sabirabad şəhər “Heydər” məscidinin imam müavini Yusif Bağırov, dini icma sədrləri, din xadimləri və dindarlar iştirak ediblər.
Tədbiri giriş sözü ilə açan Ağakərim Sadıqov milli-mənəvi dəyərlərimizin bir hissəsi olan dinimizin, dilimizin qorunmasında icmaların rolunu xüsusi qeyd edib. Müstəqilliyini yenidən qazandıqdan sonra Azərbaycanda dini mühitin zənginləşdirilməsi istiqamətində mühüm işlərin görüldüyünü bildirərək bu sahəyə dövlət tərəfindən göstərilən diqqət və qayğıdan bəhs edib.
Atakişi Məhərrəmli milli-mənəvi irsimizin qorunması, təbliği, tədqiqi və onun gələcək nəsillərə ötürülməsi istiqamətində görülən ardıcıl tədbirlərdən danışıb, Azərbaycanda milli ruhun yüksəlməsində ulu öndər Heydər Əliyevin böyük xidmətlərinin olduğunu diqqətə çatdırıb.
Sonda tədbir iştirakçılarının təklifləri dinlənilib, onları maraqlandıran suallar cavablandırılıb.