Şabran, 24 avqust, Elxan Yusifli, AZƏRTAC

Şabran rayonun Padar kəndinə çəkilən yolun asfaltlanması işləri yekunlaşıb.

AZƏRTAC-ın bölgə müxbiri xəbər verir ki, Gəndob-Xaçmaz-Yalama-Rusiya Federasiyası ilə dövlət sərhədi avtomobil yolunun 6-cı kilometrindən ayrılan Padar kəndinə gedən yolun uzunluğu 2500 metrdir. Yolun hərəkət hissəsinin eni 6 metr, çiyinlərin eni isə hər bir istiqamət üzrə 2 metr təşkil edir.

Azərbaycan Avtomobil Yolları Dövlət Agentliyi tərəfindən inşa olunan yoldan Padarla yanaşı, Borbor və Rəhimli kəndlərinin ümumilikdə 3 minə yaxın sakini istifadə edəcək.

“Yolun inşasına cari ilin iyun ayından başlanılıb. Bu yol özündə üç kəndi birləşdirir. Bu vaxta kimi bizim kənd sakinlərinin ən böyük problemi yolumuzun təmirsiz olması idi. Yayda toz, qışda isə palçıqdan yolda hərəkət etmək mümkün deyildi. Artıq bu çətinliklər aradan qalxdı. Sakinlərimiz bu yoldan istifadə edərək rayon mərkəzinə rahat gedib-gələ biləcək, eyni zamanda yetişdirdikləri kənd təsərrüfatı mallarını da daşıya biləcəklər ”, - deyə Rəhimli İnzibati Ərazi Dairəsi üzrə nümayəndənin müavini Yusif Vahabov söyləyib.

Padar kənd sakini Elmar Hüseynov AZƏRTAC-a müsahibəsində bildirib ki, yola asfalt döşənməsi onları çox sevindirir: “İllərdir təmirsiz olan yollarımız asfaltlanıb. Yolların təmiri tək avtomobilləri olan sakinləri yox hamımızı sevindirir. İndi uşaqlar məktəbə rahat gedəcəklər”

Avtomobil yolu IV texniki dərəcəyə uyğun yenidən qurulub. Marşrutboyu yararsız hala düşmüş müxtəlif diametrli suötürücü borular yeniləri ilə əvəz edilib və zəruri yerlərdə müxtəlif diametrli dəmir-beton borular quraşdırılıb.

Yaxın günlərdə hərəkətin normal təşkili üçün yol nişanları, kilometr göstəriciləri və siqnal dirəkləri quraşdırılacaq, üfüqi nişanlanma xətlərinin çəkilişi işləri aparılacaq.

Aparılan yenidənqurma işləri kənd əhalisinin gediş-gəlişinin rahatlaşdırmaqla yanaşı, yük və sərnişin daşımasını da asanlaşdıracaq.