REGİONLAR


Şabranın badam bağlarında məhsuldarlıq yüksəkdir VİDEO

Şabran, 11 iyun, Elxan Yusifli, AZƏRTAC

Şabranın badam bağlarında bu il məhsuldarlıq yüksəkdir. Rayonun Ağalıq kəndində əkilən 23 hektar badam bağından bu il 50 tona yaxın məhsul yığılması gözlənilir. Keyfiyyətli aqrotexniki qulluq, həm də badam ağaclarının böyüməsi nəticəsində bu il məhsuldarlıq ikiqat çox olacaq.

Təsərrüfatın aqronomu Ariz Ağamalıyev AZƏRTAC-ın bölgə müxbirinə bildirib ki, ötən il bağlardan 30 tona yaxın badam yığılıb. “Bu il məhsuldarlıq daha yaxşıdır. Ötən ilə nisbətən çox məhsul yığılacaq. Bağdan toplanan məhsul yerli bazarda satılır. Təsərrüfatımızda iki növ badam becərilir. 10 hektarda amerikan mənşəli “Guara”, 13 hektar yeni salınan bağlarda isə Fransadan gətirilən badam növü yetişdirilir. İlk saldığımız bağlardan artıq üçüncü ildir ki, məhsul toplayacağıq”, - deyə A.Ağamalıyev söyləyib.

Təsərrüfatçı Sahib Cəbrayılov şaxtaya və quraqlığa davamlı olması ilə seçilən xarici sort badam ağaclarından 12 kiloqrama qədər məhsul götürməyin mümkün olduğunu bildirib. Badam ağacları tam məhsula düşəndən sonra isə bir hektardan 6-10 ton məhsul yığmaq olur. Hazırda bağda ağac aralarının alaq otlarından təmizlənməsi və dərmanlanma prosesi həyata keçirilir. Sentyabr ayında badam yığımına başlanılacaq.

Şabranda, ümumilikdə, 100 hektara yaxın badam bağı var. Rayondakı badam bağlarının 73 hektarı intensiv üsulla becərilir. Buna görə də hər il həmin bağlara görə fermerlərə dövlət tərəfindən bir hektara 800 manat subsidiya ödənilir. Bu da sahibkarları yeni bağların salınmasına həvəsləndirir.

Son illərdə şimal bölgəsində ən çox badam bağı Siyəzən rayonu ərazisində salınıb. “Samur-Abşeron suvarma sisteminin yenidən qurulması” layihəsinin icrası nəticəsində rayonda yeni istifadəyə verilən suvarılan torpaqlarda 200 hektar sahədə badam ağacları əkilib.

Kənd Təsərrüfatı Nazirliyinin Meyvəçilik və Çayçılıq Elmi-Tədqiqat İnstitutunun dəstəyi ilə Şabranda 33, Qusarda isə 10 hektar badam bağı salınıb.

İnstitut tərəfindən xaricdən gətirilən badam sortunun tinglərinin istehsalı üçün də iş aparılır. Bununla gələcəkdə badam tinglərinin idxalının qarşısı yerli istehsal hesabına alınacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.