Sabunçuda yol-nəqliyyat qəzası baş verib

Bakı, 5 iyul, AZƏRTAC

İyulun 4-də saat 20 radələrində Sabunçu rayonunun Kürdəxanı qəsəbəsi ərazisində Yevlax rayon sakini R.Məmmədli idarə etdiyi “Ravon” markalı avtomobillə yolun kənarında dayanan Bakı şəhər sakini E.Bünyətova məxsus “Mercedes” markalı avtomobili vurub.

Daxili İşlər Nazirliyinin mətbuat xidmətindən AZƏRTAC-a bildiriblər ki, nəticədə R.Məmmədlinin sərnişini Firuzə Zəkiyeva hadisə yerində ölüb, özünə xəstəxanada ilkin tibbi yardım göstərildikdən sonra buraxılıb.

Faktla bağlı Sabunçu Rayon Polis İdarəsində araşdırma aparılır.