Bakı, 17 mart, AZƏRTAC

Əmək və Əhalinin Sosial Müdafiəsi Nazirliyinin Şirvan şəhərində yerləşən Əlillərin Regional Bərpa Mərkəzində sağlamlıq imkanları məhdud gənclərin əl işlərindən ibarət “Bahar sevincləri” adlı zona sərgisi təşkil olunub.

Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, Novruz bayramı münasibəti ilə keçirilən sərgidə əksəriyyəti həmin bölgədəki rayon və şəhərlərdən olmaqla 31 gəncin 350-dən artıq əl işi nümayiş olunub.

Son illər əlilliyi olan şəxslər üçün reabilitasiya sisteminin təkmilləşdirilməsi istiqamətində aparılan işlər Şirvan şəhərindəki Əlillərin Regional Bərpa Mərkəzini də əhatə edib. Şirvan şəhərində və ətraf rayonlarda yaşayan əlilliyi olan şəxslərə kompleks tibbi-sosial reabilitasiya xidmətləri göstərən Mərkəzdə əsaslı təmir işləri aparılaraq müasir tələblərə uyğun bərpa-müalicə şəraiti yaradılıb, əlillərin tibbi, sosial, peşə diaqnostikası və reabilitasiyası, habelə mədəni-kütləvi tədbirlərə, müalicə idmanına cəlb edilməsi və s. istiqamətlərdə məqsədyönlü işlər aparılır.

“Bahar sevincləri” zona sərgisində əl işləri təqdim olunan gənclər yaradıcılıq qabiliyyətlərini daha da təkmilləşdirmək üçün Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun 1 nömrəli Sağlamlıq imkanları məhdud gənclərin Peşə Reabilitasiya Mərkəzində müvafiq tətbiqi sənət növləri üzrə kurslara cəlb olunublar. Mərkəzdə xüsusi təlim məşğələləri, tanınmış mütəxəssislərin iştirakı ilə təşkil edilən treninqlər, ustad dərsləri şəraitində gənclərin bacarıqları təkmilləşdirilib.

Hazırda onlardan bir qismi Mərkəzdə peşə təlimini davam etdirir. İndiyədək həmin Mərkəzdə 1400 nəfərdən çox gənc kurslara cəlb olunub ki, onlardan 85 nəfəri bölgədəki şəhər və rayonlardan olanlardır. Əlil gənclərdən Salyan rayonundan Xəyal İslamov və Sabirabad rayonundan Sona Ağayeva Peşə Reabilitasiya Mərkəzində peşə təlimi kursu keçərkən, eyni zamanda, maraqları nəzərə alınaraq boccia idman növünə cəlb olunublar və hazırda onların ikisi də həmin idman növü üzrə milli komandanın üzvləridir.

Daha sonra sərgidə təqdim edilən əl işlərinə baxış keçirilib.

Bahar Şıxıyeva (I qrup əlil, Hacıqabul rayonu), Rəşad Ağayev (I qrup əlil, Salyan rayonu), Aytac Süleymanova (I qrup əlil, Sabirabad rayonu), Bikəxanım Vəliyeva (I qrup əlil, Saatlı rayonu), Rəşad Quliyev (I qrup əlil, Şirvan şəhəri), Ramin Səfərli (III qrup əlil, Salyan rayonu), Vüsal Babayev (I qrup əlil, Neftçala rayonu) və digər gənclərin ölkəmizin əsrarəngiz təbiəti, xalqımızın adət-ənənələrin milli-mənəvi dəyərləri, görkəmli şəxsiyyətləri əks etdirən əl işləri sərgiyə tamaşa edənlərin marağına səbəb olub.

Tədbir sağlamlıq imkanları məhdud gənclərin ifasında bədii hissə ilə yekunlaşıb.