Bakı, 9 may (AZƏRTAC, Pərvanə Rəhimova). Mayın 9-da Bakının Səbail rayonunda Azərbaycan xalqının ümummilli lideri Heydər Əliyevin anadan olmasının 91 illiyinə həsr olunmuş ənənəvi Gül bayramı keçirilmişdir.

AZƏRTAC xəbər verir ki, əlamətdar bayramla əlaqədar şəhərin mərkəzindəki Sahil bağında abadlıq işləri aparılmış, park başdan-başa yenilənmiş, burada hər üç fəvvarənin ətrafı güllərlə bəzədilmişdir.

Rayonun ali və orta ixtisas məktəblərinin, səhiyyə müəssisələrinin, uşaq yaradıcılıq mərkəzinin şagirdləri müxtəlif çiçək və güllərdən, bitkilərdən hazırladıqları rəngarəng tablolar, maketlər Bakı sakinlərinin və paytaxtımızın çoxsaylı qonaqlarının diqqətini cəlb etmişdir.

Tədbir iştirakçılarını əyinlərində rəngli kağızlardan gül formasında xüsusi geyim olan məktəbli uşaqlar qarşılamış və onları Gül bayramı münasibətilə təbrik etmişlər. Nağıllar və gözəllik aləmini xatırladan Sahil bağının girişində çiçəklərlə bəzədilmiş dekorativ tağ parkın girişinə xüsusi gözəllik vermişdir. Güldən hazırlanmış gözəl və rəngarəng gül kompozisiyaları, xüsusilə ümummilli liderimiz Heydər Əliyev və görkəmli oftalmoloq alim, akademik Zərifə xanım Əliyevanın güllərdən hazırlanmış portretləri, 2015-ci ildə Bakıda keçiriləcək “Bakı–2015” ilk Avropa Oyunlarının güllərdən düzəldilmiş emblemi diqqəti daha çox cəlb etmişdir.

Rayonun orta məktəblərinin birgə hazırladıqları Bakının və Səbail rayonunun simvolu olan Qız qalasının, paytaxtın gerbinin, şəhərimizin rəmzinə çevrilən “Alov qüllələri” kompleksinin, “Səbail” gəmisinin, Dənizkənarı Milli Parkda quraşdırılmış yeni attraksionun güldən hazırlanmış maketləri və Günəbaxan kompozisiyası bayram iştirakçılarına təqdim olunmuşdur.

Rayon bağçalarının hazırladıqları “Kəpənək” kompozisiyası, parkdakı skamyaların üzərində güllə işlənmiş müxtəlif ornamentlər göz oxşayırdı. Parkdakı kompozisiyalar insanları dönə-dönə ayaq saxlamağa, dahi şəxsiyyətə olan xalq məhəbbətinə güllərin, çiçəklərin gözəlliyi ilə baxmağa vadar edirdi.

Səbail Rayon İcra Hakimiyyətinin başçısı Asif Əsgərov jurnalistlərə müsahibəsində bildirmişdir ki, ümummilli lider Heydər Əliyevin təbiət, gözəlliklə bağlı arzuları, ideyaları onun layiqli davamçısı Prezidentimiz İlham Əliyev tərəfindən uğurla gerçəkləşdirilir. Respublikamızın hər yerində olduğu kimi, Səbail rayonunda da bu gün və sabah Gül bayramı keçiriləcəkdir. Qeyd olunmuşdur ki, ümumilikdə, Sahil bağında kompozisiyaların hazırlanmasında 350 mindən çox təbii güldən istifadə edilmişdir. “Qız qalası” maketlərinin ərsəyə gəlməsinə isə 50 mindən çox gül lazım olmuşdur.

Rayonun ərazisindəki Azərbaycan Dövlət İqtisad, Azərbaycan Dövlət Pedaqoji və Qərb universitetlərinin, 18 orta məktəbin, 18 uşaq bağçasının, 2 uşaq yaradıcılıq və texniki yaradıcılıq mərkəzi şagirdlərinin, səhiyyə müəssisələrinin, digər təşkilat və qurumların kollektivlərinin nümayiş etdirdikləri gül kompozisiyaları, müxtəlif heyvanların, tarixi yerlərin güldən hazırlanmış maketləri və müxtəlif materiallardan işlənmiş sənət nümunələri, xüsusilə ulu öndər Heydər Əliyev və görkəmli oftalmoloq alim, akademik Zərifə xanım Əliyevanın muncuqdan hazırlanmış portretləri iştirakçıların diqqətini daha çox cəlb etmişdir.

Daha sonra parkın bir hissəsində quraşdırılmış səhnədə respublikamızın incəsənət ustaları, bədii özfəaliyyət kollektivləri və rayonun musiqi məktəblərinin kollektivlərinin çıxışları ilə konsert proqramı başlanmışdır.

Bayram tədbirində orta və məktəbəqədər təhsil müəssisələrinin güllərdən və müxtəlif əlvan materiallardan hazırlanmış geyimli uşaqları Ulu Öndərimizə, xalqımıza, Vətənimizə həsr olunmuş şeir və mahnılarla çıxış etmişlər.

Sonra Bakı Şəhər İcra Hakimiyyəti müsabiqə komissiyasının üzvlərinin iştirakı ilə parkdakı gül kompozisiyaları və əl işlərinə baxış keçirilmişdir.

Tədbir konsert proqramı ilə davam etmişdir.