Salyan, 14 iyul, Mahir Babayev, AZƏRTAC

2018-ci ilin ikinci rübündə Salyanda iqtisadiyyatın bütün sahələrində uğurlar qazanılıb, sənaye və kənd təsərrüfatının inkişafı davam etdirilib, abadlıq, quruculuq və tikinti işləri sürətləndirilib. Cari ilin 6 ayında rayonda yol infrastrukturunun yaxşılaşdırılması istiqamətində mühüm tədbirlər həyata keçirilib, Ələt-Astara magistralının rayon ərazisindən keçən hissəsində həmçinin, Qaraçala-Düzənlik-Peyk kəndlərini birləşdirən yolda və 45 kilometr uzunluğunda Salyan-Neftçala avtomobil yolunda tikinti işləri başa çatdırılıb, 13,1 kilometr uzunluğunda Arbatan-Marışlı-Seyidsadıqlı-Quyçu kəndini birləşdirən kəndarası avtomobil yolunun və Noxudlu kəndindən keçən Şirvan-Salyan avtomobil yolunun 13 kilometr hissəsində tikinti işləri davam etdirilib. Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi Azərbaycan Kənd İnvestisiya Layihəsi çərçivəsində rayonun 5 kəndində 30,7 kilometrdən çox kənddaxili yola çınqıl səpilib.

AZƏRTAC-ın bölgə müxbiri xəbər verir ki, bu barədə Salyanda 2018-ci ilin ikinci rübünün yekunları və qarşıda duran vəzifələrə həsr olunan hesabat yığıncaqda rayon icra hakimiyyətinin başçısı Sevindik Hətəmov yığıncaq iştirakçılarına məlumat verib.

Yığıncaqda qeyd olunub ki, ilin altı ərzində şəhərin 38 kommunal binasında əsaslı təmir işləri görülmüş, Xəlil Rza Ulutürk 14, Yusif Qasımov 4, 6, Cəfər Cabbarlı 14, Ağaxan Ağabəyli 1A küçələrində yerləşən binaların dam örtüyü dəyişdirilərək yenisi ilə əvəz olunub, Elçin İmanov, Aşıq Pənah, Hacı Zeynalabdin Tağıyev və Taleh Davudzadə küçələrində abadlıq işləri davam etdirilib, Qüdrət Səmədov küçəsinə asfalt-beton örtüyü vurulub.

Ötən dövr ərzində rayonun Həsənli kəndi ərazisində 100 min başlıq Damazlıq Quşçuluq təsərrüfatının, Kürsəngi kəndi ərazisində İstixana kompleksinin, şəhər ərazisində Pivə və limonad istehsalı zavodunun və 2 mərtəbəli “Bazar-ticarət mərkəzi”nin, ümumi sahəsi 12,8 hektar olan 7 istixana kompleksinin tikintisi əsasən başa çatdırılıb, Xıdırlı kəndi ərazisində Zeytun və Meyvə emalı zavodlarının tikintisi sürətlə davam etdirilib.

Qeyd olunub ki, ikinci rübdə rayonda qeyri neft sektorunun, o cümlədən kənd təsərrüfatının inkişaf etdirilməsi, yeni istehsal sahələrinin yaradılması istiqamətində bir sıra tədbirlər həyata keçirilib. Azərbaycan Respublikasının İqtisadiyyat Nazirliyi Sahibkarlığa Kömək Milli Fondu tərəfindən 5 sahibkara 552 min manat kredit verilib.

Bildirilib ki, cari ilin məhsulu üçün rayonda 16 min 813 hektar sahədə taxıl, 4 min 39 hektar sahədə təzə yonca, 660 hektar sahədə dən üçün qarğıdalı, 420 hektar sahədə kartof, 1241 hektar sahədə tərəvəz, 822 hektar sahədə bostan bitkiləri, 7055 hektar sahədə pambıq əkilib. Hesabat gününə kimi sahələrdən 41 min ton taxıl, 5.1 min ton kartof, 20 min ton tərəvəz, 1.1 min ton bostan məhsulu yığımı aparılıb.

Yığıncaqda vurğulanıb ki, ötən dövrdə rayonda iribuynuzlu heyvanların sayı 63 min 315, qoyun və keçilərin sayı isə 186 min 506 baş olub. Ət istehsalı 4630, süd istehsalı 24 min 534 ton və yumurta istehsalı 17 milyon 245 min ədəd olub.

Vurğulanıb ki, hesabat dövründə əhalinin işlə təmin olunması istiqamətində müvafiq tədbirlərin həyata keçirilməsi nəticəsində 2018-ci ilin 6 ayında 510 daimi olmaqla 2856 yeni iş yeri yaradılıb.

İclasda rayonda əhalinin elektriklə, qazla, su ilə təmin edilməsi sahəsində görülən işlərdən ətraflı söhbət açılıb, təhsil, səhiyyə, mədəniyyət sahəsində qazanılan nailiyyətlər və nöqsanlar göstərilib.

Yığıncaqda müzakirə olunan məsələyə dair qərar qəbul edilib.