REGİONLAR


Salyanda mal-qaranın cins tərkibi yaxşılaşdırılır

Salyan, 21 fevral, Mahir Babayev, AZƏRTAC

Əsasən kənd təsərrüfatı rayonu olan Salyanda heyvandarlıq aqrar sektorun aparıcı sahələrindəndir. Rayonda heyvandarlığın inkişafına xüsusi diqqət yetirildiyindən ötən illərdə olduğu kimi, 2020-ci ildə də bu sahədə yaxşı nəticələr qazanılıb, mal-qaranın sayı çoxalıb, heyvandarlıq məhsulları istehsalında yaxşı nəticələr əldə olunur.

Rayon statistika idarəsindən AZƏRTAC-ın bölgə müxbirinə verilən məlumata görə, hazırda rayonun ayrı-ayrı heyvandarlıq kompleksləri və fərdi təsərrüfatlarında 62 min 746 baş iribuynuzlu mal-qara, 185 min 979 baş qoyun-keçi saxlanılır. Bu da ötən ilin müvafiq dövrü ilə müqayisədə ümumilikdə 320 baş çoxdur. Mal-qaranın baş sayının artması heyvandarlıq məhsulları istehsalına da müsbət təsir göstərir. Cari ilin ilk ayında rayonda 947.4 ton ət (diri çəkidə), 3 min 356 ton süd və 2 milyon 438 min ədəd yumurta istehsal olunub ki, bu da 2020-ci ilin yanvar ayında istehsal olunan ətdən 11 ton, süddən 16 ton və yumurtadan isə 6 min ədəd çoxdur.

Rayonda mal-qaranın cins tərkibinin yaxşılaşdırılması sahəsində də yaxşı nəticələr qazanılıb. Dövlətin süni mayalanma yolu ilə alınan buzovlara görə maldarlara əlavə subsidiyalar verməsi və cins tərkibi yaxşılaşdırılmış heyvanların ət və südünün yerli heyvanlardan çox olması fermerlərin bu sahəyə marağını da artırıb. Bu səbəbdən hazırda rayonda heyvandarlıq təsərrüfatlarında mövcud olan mal-qaranın 75-80 faizini cins tərkibi yaxşılaşdırılmış heyvanlar təşkil edir.

Qeyd edək ki, ötən il rayonda süni mayalanma aparılmış 5 min 778 ana inək və düyədən 4 min 157 baş buzov alınıb. Bu da hər 100 baş inəyə 71 baş buzov deməkdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.