REGİONLAR
Şamaxıda aşıq Ağamurad Şirvanlının 50 illiyi qeyd olunub
Şamaxı, 30 noyabr, Adil Ağayev, AZƏRTAC
Noyabrın 30-da Şamaxıda Azərbaycan aşıq sənətinin görkəmli nümayəndələrindən biri, Əməkdar Mədəniyyət İşçisi, aşıq Ağamurad Şirvanlının (Ağamurad İsrafilov) anadan olmasının 50 illiyi qeyd edilib.
AZƏRTAC xəbər verir ki, Azərbaycan Aşıqlar Birliyinin və Şamaxı Rayon İcra Hakimiyyətinin birgə təşkilatçılığı ilə rayon mədəniyyət evində təşkil edilən mərasimdə respublikamızın görkəmli elm və mədəniyyət xadimləri, aşığın sənət dostları və çoxsaylı pərəstişkarları iştirak ediblər.
Məclisin aparıcısı, Azərbaycan Milli Elmlər Akademiyası Nizami Gəncəvi adına Milli Azərbaycan Ədəbiyyatı Muzeyinin şöbə müdiri, filologiya üzrə fəlsəfə doktoru, aşıq Ağamurad Şirvanlı barədə yazılan “Mən muradlar övladıyam” kitabının müəllifi Yaqut Bahadurqızı yubilyar barədə qısa məlumat verib. Bildirib ki, o, 1964-cü il iyunun 24-də Şamaxı rayonunun Mərzəngəli kəndində dünyaya göz açıb. Aşıq Rza Qobustanlını özünə ustad sayan sənətkar 18 yaşından bu sənətin sirlərini öyrənməyə başlayıb. Bu sahədə ona dayısı, el şairi Nadir Mərzəngəlinin də böyük köməyi dəyib. Görkəmli aşıqlardan Şakiri, Bəyləri, Məmmədağanı, Pənahı, Xanışı, Şərbəti dinləyə-dinləyə bu sənətin incəliklərinə yiyələnməkdə onlardan çox şey öyrənib. Bütün bunlardan əlavə, gözəl səsi, yaddaşı, ifa bacarığı sahəsindəki fitri istedadı da onun bir aşıq kimi yetişməsində mühüm rol oynayıb.
Aşıq Ağamurad Şirvanlı artıq 1988-ci ildən məclislərə ayaq açıb, bölgələrdə, Bakıda keçirilən tədbirlərdəki çıxışlarında özünə çoxsaylı pərəstişkar toplayıb. Türkiyədə, İranda, Dağıstanda Azərbaycan aşıq sənətinin tanınmış nümayəndəsi kimi çıxışları ona mükafatlar qazandırıb. Fəxri fərmanlara, diplomlara, nəhayət Prezident İlham Əliyevin 2011-ci il 15 sentyabr tarixli Sərəncamı ilə Əməkdar Mədəniyyət İşçisi adına layiq görülüb.
Mərasimdə çıxış edən Azərbaycan Aşıqlar Birliyinin sədri, Xalq Şairi Zəlimxan Yaqub bu tədbiri sazımızın, sözümüzün əsl bayramı kimi təqdim edib. Aşığın qədim Şirvanın, Azərbaycanın, türk dünyasının sənət incisinin layiqli davamçısı olduğunu söyləyib. Bildirib ki, 1993-cü ildə Şamaxı Rayon Mədəniyyət və Turizm Şöbəsində “İncə tellər” aşıqlar ansamblının yaradılmasında fəal iştirak edən aşıq Ağamurad Şirvanlı bu gün həmin kollektivə böyük həvəslə rəhbərlik edir.
Mərasimdə iştirak edən görkəmli ilahiyyatçı alim, akademik Vasim Məmmədəliyev Azərbaycan aşıq sənətindən, onun görkəmli nümayəndələrindən söhbət açaraq Ağamurad Şirvanlının indiki aşıqlar nəsli arasında xüsusi yeri olduğunu bildirib. Natiq Aşıq Şakiri, onun bu gün də sevilə-sevilə dinlənilən məşhur “Şirvan gözəlləməsi”ni yada salaraq bu gözəlləmənin indiki nəsil aşıqlar arasında ən yaxşı ifaçısının aşıq Ağamurad olduğunu söyləyib.
Mərasimdə nümayiş etdirilən videoçarxda aşığın ifasında səsləndirilən mahnılar, Xalq Artisti Zabit Nəbizadənin və digər sənətkarların ifaları, “Rasimlər” qrupunun çıxışları tədbirə xüsusi əlvanlıq qataraq, iştirakçılarında xoş əhval-ruhiyyə yaradıb.
Mərasimdə aşıq Ağamurad Şirvanlıya anadan olmasının 50 illiyi ilə əlaqədar rayon icra hakimiyyətinin, Azərbaycan Aşıqlar Birliyinin fəxri fərmanları verilib.
Axırda aşıq Ağamurad Şirvanlı qonaqlara və pərəstişkarlarına təşəkkür edib. Ölkəmizdə mədəniyyətin inkişafına, mədəniyyət işçilərinə, sənətkarlara göstərdiyi diqqət və qayğıya görə Prezident İlham Əliyevə minnətdarlığını bildirib.