REGİONLAR
Şamaxıda kənd təsərrüfatı məhsullarının istehsalı 14,7 faiz artıb
Şamaxı, 19 oktyabr, AZƏRTAC
Cari ilin doqquz ayında Şamaxı rayonunda 168,2 milyon manat dəyərində ümumi məhsul buraxılışı olub. Bu da ötən ilin müvafiq dövrü ilə müqayisədə 60,5 milyon manat çoxdur. Hesabat dövründə rayon iqtisadiyyatının aparıcı sahəsi olan kənd təsərrüfatında məhsulların həcmi 14,7 faiz artaraq 48,1 milyon manata, sənayedə 24 faiz artaraq 4,5 milyon manata çatıb. Doqquz ayda rayon üzrə 2165 daimi iş yeri açılıb.
AZƏRTAC xəbər verir ki, bu məlumatlar rayonda doqquz ayın sosial-iqtisadi inkişafının yekunları və qarşıda duran vəzifələrə həsr edilən müşavirədə səsləndirilib.
Rayon icra hakimiyyətinin başçısı Asif Ağayev, eləcə də digər çıxış edənlər oktyabrın 2-də Prezident İlham Əliyevin Şamaxıya tarixi səfərindən, bir sıra obyektlərin açılışında iştirak etməsindən, rayonun istər sosial, istərsə də iqtisadi inkişafına göstərdiyi diqqət və qayğıdan, verdiyi tövsiyə və tapşırıqlardan danışıblar.
Müşavirədə vaxtilə Azərbaycanın ən böyük üzümçülük rayonlarından olan Şamaxıda hazırda bu sahənin inkişafı ilə əlaqədar görülən işlər geniş təhlil olunub. Vurğulanıb ki, 2012-2020-ci illərdə Azərbaycan Respublikasında üzümçülüyün inkişafına dair Dövlət Proqramı təsərrüfatın bu sahəsinin yenidən dirçəldilməsində böyük rol oynayıb. Artıq plantasiyaların sahəsi 1650 hektara çatdırılıb. Meysəri kəndi ərazisində yerləşən “Şirvan Şərabları” müəssisəsində 121,5 hektar yeni üzüm bağları salınıb. Hazırda bu iş davam etdirilir. Doqquz ayda kənd təsərrüfatının aparıcı sahələrindən olan taxılçılıqda, heyvandarlıqda da uğurlu nəticələr qazanılıb. Bütün göstəricilər üzrə heyvandarlıq məhsulları istehsalı ötən ilin müvafiq dövrünə nisbətən artıb.
Müşavirədə tikinti-quruculuq və abadlıq işləri, xüsusən yol infrastrukturunun yaxşılaşdırılması istiqamətində xeyli işlərin görüldüyü diqqətə çatdırılıb. Şəhərin mərkəzində 20 Yanvar parkı yenidən qurulub və əsaslı təmir olunub. 4 saylı 100 yerlik körpələr evi-uşaq bağçası istifadəyə verilməyə hazırdır. Qarabağ müharibəsi əlilləri və şəhid ailələri üçün inşa edilən 36 mənzilli yaşayış binasında tamamlanma işləri görülür və s.
Doqquz ayda təhsil, səhiyyə və mədəniyyət sahələrinin maddi-texniki bazasının yaxşılaşdırılması, əhalinin təbii qaz, elektrik enerjisi ilə normal təminatı istiqamətində planlaşdırılan layihələr uğurla yerinə yetirilib. Ən ucqar yaşayış məntəqələrindən olan Dəmirçi kəndi qazlaşdırılıb.
Turizm potensialı yüksək olan Şamaxıda bu sahənin inkişafı istiqamətində də tədbirlər davam etdirilir. Hazırda rayon ərazisində 3 beşulduzlu otel, 22 istirahət mərkəzi fəaliyyət göstərir. Doqquz ayda rayona 103 min 496 nəfər turist gəlib ki, onlardan 35 min 395 nəfəri xarici turistlərdir.
Doqquz ayda görülən işlərin geniş təhlil olunduğu müşavirədə qarşıda duran mühüm və təxirəsalınmaz vəzifələr də müzakirə edilib, konkret tədbirlər müəyyənləşdirilib.