İQTİSADİYYAT


Şanlı Zəfərimizin ildönümü münasibətilə Türkiyənin İzmir vilayətində xatirə meşəsi salınıb VİDEO

İstanbul, 23 noyabr, AZƏRTAC

Azərbaycanın 44 günlük Vətən müharibəsində əldə edilən şanlı Zəfərin ildönümü münasibətilə “SOCAR Turkey Enerji A.Ş.”(STEAŞ) tərəfindən Türkiyənin İzmir vilayətinin Aliağa rayonunda xatirə meşəsi salınıb.

AZƏRTAC xəbər verir ki, "Azərbaycan, Qarabağ xatirə meşəsi" Azərbaycanın müstəqilliyi uğrunda canından keçən qəhrəmanlarımızın xatirəsinin əbədiləşdirilməsinə xidmət edir.

Bu məqsədlə keçirilən mərasimdə çıxış edən “SOCAR Turkey Enerji A.Ş.”nin (STEAŞ) baş direktoru Zaur Qəhrəmanov bildirib ki, 1991-ci ildə Azərbaycan öz müstəqilliyini bərpa etdikdə ölkəmizin yanında olan və müstəqilliyini tanıyan ilk ölkə Türkiyə oldu. Qırx dörd günlük Vətən müharibəsində də istər xalqı, istər başda Prezident Rəcəb Tayyib Ərdoğan olmaqla dövləti ilə bu haqlı savaşda Türkiyə yanımızda oldu və biz Zəfər qazandıq, Qarabağımızı qaytardıq. Xatirə meşəsində əkilən tinglərin Vətənimiz uğrunda canından keçən oğullarımızın xatirəsinin yaşadılması üçün əkildiyini deyən Z.Qəhrəmanov Azərbaycanla-Türkiyə arasındakı tarixi bağın heç bir vaxt qırılmayacağını vurğulayıb.

İzmirin meşələr üzrə bölgə müdiri Zafer Derince daima Azərbaycanın yanında olmaq və müstəqilliyi uğrunda canından keçən oğullarımızın xatirəsinin yaşadılması üçün yaradılan bu meşənin təxminən 467 hektar ərazidə salındığını, bu kampaniyanın davamı olaraq ərazidə ümumilikdə müxtəlif növ 170 min ağacın əkiləcəyini deyib.

Aliağa Bələdiyyəsinin sədri Serkan Acar və Aliağa kaymakamı Ömer Karaman Azərbaycanın müstəqilliyini əldə etdikdən sonra Vətən müharibəsinədək keçdiyi yol və ermənilər tərəfindən xalqımıza qarşı törədilən cinayətlər haqqında danışıb, bu tarixi Qələbə münasibətilə bütün türk dünyasını təbrik ediblər.

Sonra iştirakçılar tərəfindən 20 min ting əkilib.

 

Günel Məlikova

AZƏRTAC-ın xüsusi müxbiri

İstanbul

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.