MƏDƏNİYYƏT


Şanxayda 22-ci beynəlxalq film festivalı başlayır VİDEO

Pekin, 15 iyun, AZƏRTAC

Çinin Şanxay şəhərində 3500-dən çox filmin təqdim olunacağı 22-ci beynəlxalq festival işə başlayır.

AZƏRTAC festivalın təşkilat komitəsinə istinadla xəbər verir ki, tədbirin proqramına müsabiqə, sərgi, təqdimatlar, forumlar və s. daxildir. “Qızıl qədəh” mükafatı uğrunda müsabiqənin beynəlxalq münsiflər heyətinə Türkiyədən tanınmış kinorejissor Nuri Bilge Ceylan, italyan rejissor və ssenari müəllifi Polo Cenoviz və digərləri daxildir. Mükafat uğrunda 3 Çin filmi ilə yanaşı, Yaponiya, İtaliya, Almaniya, Braziliya və digər ölkələrin filmləri mübarizə aparır.

Festival çərçivəsində Asiya ölkələrinin ayrıca kino sərgiləri, Asiya film panoraması, film salonu və “Asiyanın yeni istedadları” mükafatı uğrunda müsabiqə də təşkil olunacaq.

Beynəlxalq Film İstehsalçıları Assosiasiyalarının Federasiyası tərəfindən tanınan festivalın açılış mərasimi bir sıra texniki yeniliklərə şahidlik edəcək. Belə ki, Çində ilk dəfə olaraq açılış mərasimi 5G mobil rabitə şəbəkəsi və 4K texnologiyasından istifadə olunmaqla yayımlanacaq. Bundan başqa, yayım zamanı süni zəka (Aİ) texnologiyasından da istifadə olunacaq.

İyunun 25-dək davam edəcək festival günlərində Şanxayın 47 kinoteatrında 500-dən çox film nümayiş olunacaq. Bundan başqa, “Bir kəmər, bir yol” film həftəsi də keçiriləcək. Xatırladaq ki, ötənilki festival çərçivəsində “Bir kəmər, bir yol” film festivalı alyansı təsis edilmişdi. Bu il 7 yeni üzvün qəbul edilməsi ilə alyansda təmsil olunan ölkələrin sayı 33-ə çatacaq.

Qeyd edək ki, son illər Çinin kino sənayesi sürətlə inkişaf edir. Ölkədə hazırda 10 mindən çox kinoteatrda təxminən 58 min kinoekran fəaliyyət göstərir ki, bu da sayca dünyada ən çoxdur. Planetin ən böyük ikinci kino bazarı olan Çində ötən il kassa yığımı 9 faiz artaraq 61 milyard yuana (8,88 milyard ABŞ dolları) çatıb.

Şahin Cəfərov

AZƏRTAC-ın xüsusi müxbiri

Pekin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.