MƏDƏNİYYƏT
Şarm Əl-Şeyx-Bakı birbaşa aviareysi iyun ayının 3-dən həyata keçiriləcək VİDEO
Bakı, 16 may, Elvin Camalov, AZƏRTAC
Şarm Əl-Şeyx-Bakı birbaşa aviareysi iyun ayının 3-dən həyata keçirilməyə başlayacaq. Uçuş 4 saat davam edəcək və bir biletin qiyməti orta hesabla 350 ABŞ dolları təşkil edəcək
AZƏRTAC xəbər verir ki, bu barədə mayın 16-da Azərbaycan və Misir Ərəb Respublikası arasında turizm sektoru üzrə əməkdaşlığa həsr olunan mətbuat konfransında deyilib.
Mətbuat konfransında Misir Turizm İdarəsi və Misir Otellər Assosiasiyasının rəhbərlərinin iştirakı ilə turizm bazarının cari vəziyyəti, eləcə də bu sahə üzrə yeni təşəbbüslər barədə jurnalistlərə məlumat verilib, Misirin kurortlarındakı turizm xidmətlərinin keyfiyyəti baxımından yeni imkanlar təqdim edilib.
Misir Ərəb Respublikasının Azərbaycandakı fövqəladə və səlahiyyətli səfiri xanım Suzan Cəmil Nuh, Misir Turizm İdarəsinin planlaşdırma şöbəsinin rəhbəri Əhməd Şükri, Misirin Praqadakı Turizm idarəsinin rəhbəri Məhəmməd Desuki, Misir Otellər Assosiasiyasının rəhbəri Məhəmməd Eyyub, Misirin Turizm Federasiyası Palatasının nümayəndələri Əli Qonaym və Adel əl-Haqar, “Air Cairo” şirkətinin kommersiya direktoru Fəthi Attia, eyni zamanda Misirin 13 aparıcı turoperatoru Azərbaycanda yerli turizm şirkətləri ilə səmərəli əməkdaşlıq əlaqələri qurmaq üçün tədbirdə iştirak edirlər.
Səfir Suzan Cəmil Nuh bildirib ki, turizm sektoru Misir iqtisadiyyatında ən mühüm yerlərdən birini tutur: “Biz burada yaranacaq əməkdaşlıq əlaqələrini yaxından izləyəcəyik və düşünürəm ki, turizm sahəsində əməkdaşlıq əlaqələri Azərbaycan və Misir arasında digər sahələr kimi güclü inkişafa malik olacaq”.
Misir Turizm İdarəsinin planlaşdırma şöbəsinin rəhbəri Əhməd Şükri bildirib ki, qısa zamanda Azərbaycanın sürətli inkişafı və iqtisadiyyatının güclənməsi onu çox təəccübləndirib. Azərbaycan yaxın zamanda turizm sahəsində dünyada öz yerini tutan bir ölkə olacaq. “Biz əlaqələrin qurulması və qarşılıqlı inkişafı əldə etmək üçün buradayıq. Məqsədimiz həm Azərbaycan turistlərini Misirə dəvət etmək və Misir turistlərini də Azərbaycanın gözəl məkanlarına səfərlərini təşkil etməkdir”, - deyə Ə.Şükri vurğulayıb.
Misir Otellər Assosiasiyasının rəhbəri Məhəmməd Eyyub qeyd edib ki, Misirdə kifayət qədər turizm obyektləri var. Otellərin 50 faizi 2-3 ulduzludur.
Onun sözlərinə görə, 4 milyondan artıq misirli turizm sektorunda fəaliyyət göstərir və ölkənin ÜDM-in təxminən 12 faizi turizm sektorundan əldə edilən gəlir hesabına formalaşır. Son 10 il ərzində Misiri ziyarət edən turistlərin sayı 5 milyon nəfərdən 15 milyon nəfərə qədər, yəni 3 dəfə, kurortda otel yerlərinin sayı isə 18 min otaqdan 280 min otağa qədər artıb. Əlavə olaraq, 250 min otağın istifadəyə verilməsi də planlaşdırılır.
Misirin Turizm Federasiyası Palatasının nümayəndələri Əli Qonaym Azərbaycanla Misir arasında oxşarlıqların olduğunu söyləyib. “Burada olan zaman insanların qonaqpərvərliyi, yeməklərin dadı, geyimlər mənim özümü yad hiss etməyə imkan vermədi. Misir Turizmi haqda bir az məlumat vermək istəyirəm. Qeyd edim ki, qışda belə Qırmızı Dənizdə o cümlədən Şarm Əl-Şeyxdə insanlar dincələ, çimərlikdən istifadə edə bilərlər. Misir, həmçinin abidələri ilə də turistlərin ən sevimli məkanlarından biridir”, - deyə Əli Qonaym vurğulayıb.
“Air Cairo” aviaşirkətinin kommersiya direktoru Fəthi Attia Şarm Əl-Şeyxə turistlərin cəlbi üçün iyun ayının 3-dən birbaşa aviareysə start veriləcəyini və bununla kifayətlənməyib digər şəhərlərə də uçuşların təşkil ediləcəyini bildirib. Onun sözlərinə görə ilkin mərhələdə Şarm Əl-Şeyxə uçuşlar həftədə 1 dəfə - cümə günü “Air Cario” aviaşirkəti tərəfindən “Airbus A320” təyyarəsi ilə həyata keçiriləcək. Təyyarə 09:30-da Bakıdan havaya qalxacaq və yerli vaxtla 11:00-da Şarm Əl-Şeyxə çatacaq. Əks istiqamətdə isə 03:00-da havaya qalxan təyyarə 08:30-da Bakıda olacaq. Daha sonra isə aviareyslərin sayının artırılması gözlənilir. Bir biletin qiyməti gediş-gəliş daxil olmaqla orta hesabla 350 ABŞ dolları təşkil edəcək
Daha sonra Misirin Praqadakı Turizm idarəsinin rəhbəri Məhəmməd Desuki Misirin turizm imkanları ilə bağlı təqdimatla çıxış edib.
O bildirib ki, azərbaycanlıların Misirdəki turizm imkanlarından faydalanması baxımından, Misir Turizm Nazirliyi və Misirin turoperatorları hər iki ölkə arasında səmərəli əməkdaşlığı davam etdirmək əzmindədirlər və bu gün azərbaycanlı turistlərə yeni və yüksək keyfiyyətli cəlbedici turizm paketlərini təklif etməyə hazırdırlar. “2011-2013-cü illərdə Misirə səfər edən azərbaycanlı turistlərin sayında müəyyən azalmadan sonra son zamanlar onlar arasında Misir kurortlarının populyarlığı yenidən artıb. Belə ki, son iki il ərzində Misiri minlərlə azərbaycanlı ziyarət edib. Dekabr, yanvar və mart ayları səyahət üçün daha populyar aylar hesab olunur. Kurortlara səfər etmək də çətin deyil - ən yaxın zamanda Bakıdan birbaşa təyyarə reysinin açılması planlaşdırılır”,- deyə Məhəmməd Desuki vurğulayıb.