Moskva, 17 fevral, AZƏRTAC

Azərbaycan Prezidenti İlham Əliyev ilə Ermənistanın baş naziri Nikol Paşinyanın Münhen konfransında görüşündən düz bir il, “Valday” Beynəlxalq Diskussiya Klubunun XVI illik iclasının plenar sessiyasından isə bir ildən bir qədər çox vaxt keçib.

Rusiyalı politoloq Səadət Qədirova AZƏRTAC-ın müxbiri ilə söhbətində bu iki diskussiyanın yekunları fonunda Cənubi Qafqazda yaranmış vəziyyət barədə fikirlərini bölüşüb.

O deyib: “Münhen konfransı zamanı Nikol Paşinyanın bir neçə dəfə Prezident Əliyevə müraciət edərək onu regionda davamlı sülh yaradılması üçün əməli fəaliyyətə çağırdığını yaxşı xatırlayıram. O deyirdi: “Hesab edirəm ki, bizim davamlı sülhə ehtiyacımız var... Mən Prezident Əliyevə müraciət edirəm, bu vəziyyətdə anlamalıyıq ki, davamlı sülh və sabitlik yaratmaq bizim qarşılıqlı vəzifəmizdir...”

Bu gün görürük ki, bu davamlı sülhü Azərbaycan yaradır - Ali Baş Komandanın rəhbərliyi və öz ordusunun köməyi ilə. Həmin konfrans da daxil olmaqla bütün beynəlxalq məkanlarda haqqında söhbət gedən davamlı sülh budur”.

Politoloqun fikrincə, Azərbaycan 30 il ərzində regionu boğan, ticari-iqtisadi əlaqələrin inkişafını ləngidən, bütün səviyyələrdə gərginlik yaradan düyünü kəsib.

S.Qədirova vurğulayıb: “Azərbaycana göstərilən ağlasığmaz beynəlxalq təzyiq, beynəlxalq liderlərin, BMT Təhlükəsizlik Şurasının üzvlərinin zəngləri bir daha göstərdi ki, beynəlxalq erməni lobbisi çox güclüdür. Ermənistanın sabiq prezidenti Robert Koçaryan bu yaxınlarda öz müsahibəsində erməni lobbisini “şəbəkə” kimi səciyyələndirib. Onunla razılaşmaya bilmərəm, bütün dünya üzrə erməni lobbi şəbəkəsi münaqişəni uzun müddət dondurmaq üçün əlindən gələni edir, çox böyük məbləğdə pul xərcləyirdi. Ermənistanın özündəki ermənilər, əslində, yalnız öz mənafeləri naminə fəaliyyət göstərən beynəlxalq erməniliyin girovlarına çevrilib. Ermənistan dilənçi günündədir, erməni xalqını aldadırlar”.

Politoloq qeyd edib ki, “Dağlıq Qarabağ Ermənistandır” kimi populist fikirlər təxribat xarakteri daşıyırdı. Şuşada inauqurasiya mərasimi və sülh danışıqlarının dəfələrlə pozulması ona gətirib çıxartdı ki, Azərbaycan BMT Təhlükəsizlik Şurasının dörd qətnaməsini de-yure və de-fakto təkbaşına həyata keçirdi, öz torpaqlarını azad etdi. Ermənistanın “hərbi qüdrəti” və “erməni əsgərinin məğlubedilməzliyi” barədə bitib-tükənməyən söhbətlər oyuncaq ev kimi puç oldu, bu gün artıq heç kəs belə nağıllara inanmır. Beynəlxalq birlik torpaqların azad edilməsi barədə beynəlxalq sazişlərin həyata keçirilməsinə kömək etməsə də, Azərbaycanın qələbəsini etiraf etməyə məcbur olub.

S.Qədirova deyib: “Bir məqamı qeyd etməyə bilmərəm ki, Rusiya Prezidenti Vladimir Putinin dəfələrlə vurğuladığı kimi, “müharibə Azərbaycan ərazisində gedir və erməni təbliğatının KTMT-ni bu münaqişəyə cəlb etmək üçün bütün cəhdləri uğursuz oldu. Ermənistan Gəncəyə və Bərdəyə vəhşicəsinə raket zərbələri endirib. Azərbaycanı guya gecə vaxtı öz xalqını bombalamaqda təqsirləndirən Ermənistan rəhbərliyinin həyasızlığı vaxtilə Xocalı faciəsinin guya Ayaz Mütəllibovun devrilməsinin nəticəsi olması barədə erməni yalanlarının davamıdır. Yeri gəlmişkən, Nikol Paşinyan da Münhen görüşünün tribunasından çığıra-çığıra bunları deyirdi. Belə ritorika nə sülhə, nə də quruculuğa gətirib çıxara bilərdi”.

Ekspert qeyd edib ki, erməni lobbisi Azərbaycanın beynəlxalq layihələrinə göz dikmişdi. Onlara elə gəlirdi ki, Azərbaycan tammiqyaslı hərbi əməliyyatlar aparmağa risk etməyəcək, amma onlar yanılırdı. Azərbaycan özünün tamdəyərli regional subyekt, Azərbaycan lideri isə dünya miqyaslı siyasi xadim və strateq olduğunu göstərdi”.

S.Qədirova sonda deyib: “Bu, Azərbaycan ordusunun Ermənistan ordusu üzərində, Azərbaycan diplomatiyasının Ermənistan diplomatiyası üzərində, nəhayət Prezident İlham Əliyevin dünya erməniləri - təkcə regional sabitliyə meydan oxumaqla kifayətlənməyib, həm də öz xalqını alçaldıcı, məğlubiyyəti labüd olan müharibəyə sövq etmiş Ermənistan liderləri üzərində qələbəsidir”.

Fəridə Abdullayeva

AZƏRTAC-ın xüsusi müxbiri

Moskva