Bakı, 30 sentyabr, AZƏRTAC

1992-ci ildə Azərbaycan ilə Çin arasında diplomatik münasibətlərin qurulduğu vaxtdan möhkəm təməl üzərində qurulan ikitərəfli münasibətlər qarşılıqlı fayda əsasında uğurla inkişaf edir. İkitərəfli münasibətlərin inkişafı kursu həm Azərbaycan rəhbərliyinin, həm də ÇXR rəhbərliyinin xarici siyasətində həmişə prioritet olub.

Azərbaycan və Çin siyasi, iqtisadi və nəqliyyat-logistika sahələrində uğurla əməkdaşlıq edir. Böyük İpək Yolu ilə tarixən bağlı olan Azərbaycan və Çin arasında humanitar sahədə əməkdaşlıq son illərdə yeni təkan alıb. Bu, ilk növbədə Avrasiya nəqliyyat-iqtisadi dəhlizlər yaradılması, habelə İpək Yolu boyunca yerləşən ölkələrin humanitar əlaqələrinin genişləndirilməsi, siyasi ünsiyyət və mədəniyyətlərarası dialoq üzrə Çinin irəli sürdüyü “Bir kəmər, bir yol” təşəbbüsünün həyata keçirilməsində Azərbaycanın fəal iştirakı ilə bağlıdır.

AZƏRTAC bu münasibətlə Çin Xalq Respublikasının Azərbaycandakı fövqəladə və səlahiyyətli səfiri xanım Qo Minin məqaləsini təqdim edir.

X X X

2022-ci il oktyabrın 1-də Çin Xalq Respublikasının yaradılmasından 73 il keçir. Bu mühüm hadisə ilə əlaqədar ÇXR-in Azərbaycandakı səfirliyi adından Azərbaycan cəmiyyətinin bütün təbəqələrinin nümayəndələrinə - daim Çinin inkişafının qayğısına qalan, ölkələrimiz arasında dostluğu dəstəkləyən insanlara səmimi minnətdarlığımı və dərin hörmətimi bildirmək istərdim. İcazə verin, Azərbaycandakı bütün həmvətənlərimi də səmimi qəlbdən salamlayım və təbrik edim.

73 il bundan əvvəl Çin Xalq Respublikası yaradıldığı andan Çin xalqı Çin Kommunist Partiyasının qətiyyətli rəhbərliyi ilə əzmlə çalışır, öz milli reallıqlarına uyğun gələn Çin spesifikalı sosializm yolu ilə irəliləyir. Bu illər ərzində Çin öz qüdrətini artırmaq, böyük nailiyyətlər qazanmaq üçün güclü sıçrayış edib. Bu nailiyyətlər Çin millətinin və bəşər sivilizasiyasının inkişafı tarixinə daxil olub. Çinin iqtisadi, elmi və texnoloji qüdrəti və beynəlxalq təsiri yeni səviyyəyə çatıb. Çin dünyada ikinci ən böyük iqtisadiyyata malik olan ən iri sənaye dövləti, əmtəələrin ən iri tədarükçüsü və valyuta ehtiyatlarının ən iri sahibi olub. Çin həm də dünya iqtisadiyyatının “mühərriki”, regional əməkdaşlığın “sürətləndiricisi” və qlobal inkişafın “sabitləşdirici lövbəri” olub.

XVIII Ümumçin qurultayından sonra yoldaş Si Çinpin başda olmaqla Çin Kommunist Partiyası Mərkəzi Komitəsi böyük tarixi təşəbbüskarlıq, böyük siyasi mərdlik və böyük məsuliyyət nümayiş etdirərək, çətinlikləri aradan qaldıraraq köhnəlikləri inqilabi şəkildə dəyişdirib, yeniliyi təşviq edib, tarixi nəticələrə nail olmaq və tarixi islahatlar keçirmək üçün partiya və dövlətin işini irəli aparıb. Çin millətinin böyük dirçəlişi kimi qarşısıalınmaz tarixi proses belə başlanıb. 2021-ci ildə Çinin ÜDM-i 17,73 trilyon AB, dollarına çatıb, adambaşına ÜDM 12.500 dollardan çox olub. Dünya iqtisadiyyatının artımına Çin iqtisadiyyatının ümumi töhfəsi təqribən 30 faiz səviyyəsində qalıb və Çin dünyada iqtisadi artımın ən iri hərəkətverici qüvvəsinə çevrilib. Biz bu yüzilliyin birinci hədəfinə uğurla çatmışıq: Çində orta təminatlı cəmiyyət qurulub. Çin xalqı mütləq yoxsulluq problemini həll edib və yüzilliyin ikinci hədəfinə - modernləşdirilmiş böyük sosialist dövləti qurmaq yoluna qədəm qoyub. Çin diplomatiyası əzmlə və novatorcasına irəliləyir, tarixi nailiyyətlər qazanır. Çin spesifikalı böyük dövlətin diplomatiyası hərtərəfli inkişaf edib. “Bir kəmər, bir yol” təşəbbüsünün yüksək səviyyədə həyata keçirilməsində səmərəli praktiki nəticələr əldə edilib; vahid taleli bəşər cəmiyyətinin qurulması zamanın ruhunu və bəşəriyyətin hərəkət istiqamətini göstərən bayrağa çevrilib. Qlobal inkişaf və qlobal təhlükəsizlik təşəbbüsləri iki əsas beynəlxalq problem – sülhün təmin edilməsi və inkişaf üçün yeni qərarlar və ideyalar aşkara çıxarıb. Yeni dövrdə Çin həmişə öz inkişafını bəşəriyyətin inkişaf koordinatları sisteminə uyğunlaşdırıb. Çin inkişaf yolunda durmadan irəliləyir, dünyaya xeyir verir, bütün dünyada sülhün qurucusu, qlobal inkişafın iştirakçısı və beynəlxalq asayişin müdafiəçisi kimi çıxış edərək insanların qəlbini fəth edir.

Oktyabrın 16-da Pekində Çin Kommunist Partiyasının XX Ümumçin qurultayı keçiriləcək. Fövqəladə əhəmiyyətə malik olan bu tədbir başa çatanda partiyamız modernləşdirilmiş sosialist dövləti quruculuğuna və yüzilliyin ikinci hədəfinə nail olmaq üçün yeni yürüşə çıxacaq. Qurultayda islahatlar və Çinin inkişafı gedişində toplanmış mühüm nailiyyətlər və qiymətli təcrübə hərtərəfli ümumiləşdiriləcək, milli inkişafın yeni reallıqları və xalqın gözləntiləri tam şəkildə nəzərə alınmaqla fəaliyyət proqramları və siyasi kurslar müəyyən ediləcək. Biz Çin spesifikalı modernləşmə vasitəsilə Çin millətinin dirçəldilməsi üçün israrla çalışacaq, bəşəriyyətin vahid taleli cəmiyyətinin qurulmasına fəal kömək edəcək, Çinin gələcək inkişafı sayəsində dünyaya yeni imkanlar açacaq, bütün dünyada sülhün və inkişafın, bəşər sivilizasiyasının tərəqqisinin təmin edilməsinə öz müdrikliyimizi və qüvvəmizi sərf edəcəyik.

Bu il biz Çin ilə Azərbaycan arasında diplomatik münasibətlərinin qurulmasının 30 illiyini təntənəli şəkildə qeyd edirik. Bu 30 il ərzində Çin-Azərbaycan münasibətləri daim dəyişməkdə olan beynəlxalq şəraitdə zamanın sınağından uğurla çıxıb. Bizim qarşılıqlı siyasi etimadımız daim dərinləşib, praktiki əməkdaşlıq səmərəli nəticələr verib, humanitar və mədəni əlaqələr daha sıx olub. Ənənəvi dostluq dərinləşib. Hazırda bizim ikitərəfli münasibətlərimiz tarixi yüksək səviyyəyə çatıb. Sentyabrın 15-də ÇXR sədri Si Cinpin və Azərbaycan Prezidenti İlham Əliyev Şanxay Əməkdaşlıq Təşkilatının Səmərqənd sammiti çərçivəsində uğurlu ikitərəfli görüş qarşılıqlı münasibətlərin gələcək inkişafının yeni istiqamətini müəyyən edib, bu prosesə yeni təkan verib. ÇXR sədri Si Cinpin vurğulayıb ki, hər iki tərəf qarşılıqlı münasibətləri strateji baxımdan nəzərdən keçirməli və planlaşdırmalıdır. Tərəflər qarşılıqlı etimadı möhkəmlətməli, qarşılıqlı dəstəyi gücləndirməli, müxtəlif sahələrdə qarşılıqlı faydalı ikitərəfli əməkdaşlığın sabitliyinə, dərinliyinə və praktiki səmərəsinə şərait yaratmalıdır.

Çin Xalq Respublikasının Azərbaycandakı səfirliyi Azərbaycan hökuməti və Azərbaycan cəmiyyətinin bütün təbəqələrinin dost əhval-ruhiyyəli nümayəndələri ilə birlikdə dövlət başçıları arasında əldə edilmiş mühüm konsensusu qətiyyətlə həyata keçirmək üzərində çalışmağa, “Bir kəmər, bir yol” birgə təşəbbüsü çərçivəsində praktiki əməkdaşlığı dərinləşdirməyə, ikitərəfli münasibətləri daha yüksək səviyyə çatdırmağa hazırdır.

Müdriklər demişkən, yolçu yolda gərək. Bu əsrdə baş vermiş, əvvəllər misli görünməmiş pandemiya və digər qlobal hadisələr fonunda dünya yeni coşqun dəyişikliklər dövrünə qədəm qoyub. Tarixdə və dünyada nadir hallarda rast gələn risklər və təhdidlər qarşısında Çin Azərbaycan ilə birgə işləməyə, tarixin və bəşəriyyətin tərəqqisində düzgün mövqe tutmağa hazırdır. Gəlin əl-ələ verib bəşəriyyətin vahid gələcəyini quraq, dünyamızı birlikdə təkmilləşdirək!