CƏMİYYƏT
Səfirliyin əməkdaşları Rusiya hüquq-mühafizə orqanları tərəfindən saxlanılan həmvətənlərimizlə görüşüblər
Moskva, 10 sentyabr, AZƏRTAC
Bu il iyunun 15-də Azərbaycan-Rusiya sərhədində baş vermiş toqquşma nəticəsində 10 nəfər və iyulun 23-24-də Moskva şəhərindəki məlum iğtişaşlar zamanı 11 nəfər Azərbaycan vətəndaşı Rusiyanın hüquq-mühafizə orqanları tərəfindən saxlanılıb.
Azərbaycanın Moskvadakı səfirliyindən AZƏRTAC-a bildiriblər ki, həmvətənlərimizin vəziyyəti ilk gündən səfirliyin nəzarəti altındadır. Onlarla görüşlər keçirmək üçün Rusiyanın aidiyyəti qurumları ilə mütəmadi təmaslar qurulub və səfirliyin səlahiyyətləri çərçivəsində lazımi addımlar atılıb.
Səfirliyin müşaviri, konsul Toğrul Sadıqov və konsulluğun üçüncü katibi Müsənnif Dadaşov Moskva şəhər Baş Polis İdarəsinin Cənub-Şərq İnzibati dairəsi üzrə idarəsinin müstəntiqi, ədliyyə leytenantı A.Pavlovla görüşüblər. Söhbət əsnasında bildirilib ki, hazırda istintaq davam edir.
Rusiyanın müvafiq təşkilatlarından razılıq alınandan sonra səfirliyin adları qeyd olunan əməkdaşları Rusiya Federasiyasının Cəzaların İcrası Federal Xidmətinin Moskva şəhəri üzrə idarəsinin 7 nömrəli istintaq təcridxanasında olan Pərviz Həmidov (Rusiya vətəndaşı), Murtuzəli Zahidov və Bəhruz Vəliyevlə görüşüblər. Rusiya Federasiyasının Cəzaların İcrası Federal Xidmətinin Moskva şəhəri üzrə idarəsinin 1 və 2 nömrəli İstintaq təcridxanalarında saxlanılan digər 8 vətəndaşımızla da görüşün təşkil edilməsi üçün aidiyyəti üzrə müraciətlər edilib.
Sentyabrın 2-3-də Toğrul Sadıqov və Müsənnif Dadaşov Rusiyanın Dağıstan Respublikasının ərazisində baş vermiş məlum insident nəticəsində saxlanılan Azərbaycan vətəndaşları ilə görüşmək üçün Dərbənd şəhərinə ezam olunublar.
Burada onlar Rusiya Federasiyası Cəzaların İcrası Federal Xidmətinin Dağıstan Respublikası üzrə idarəsinin 2 nömrəli istintaq təcridxanasında saxlanılan 7 vətəndaşımız - Əziz Fərəczadə, Rövşən Hüseynov, Elmar Musayev, Emin İmaməliyev, Tural Qiyasov, Nahid Ağayev və Elbrus Əhmədovla görüşüblər. Digər 3 nəfər barədə isə ev dustaqlığı qətimkan tədbiri seçilib.
Keçirilmiş bütün görüşlər zamanı vətəndaşlarımız saxlanma şəraitlərinin qənaətbəxş olduğunu, ayrı-seçkiliklə üzləşmədiklərini, təcridxana rəhbərliyi və ya istintaq orqanı tərəfindən təzyiqlərə məruz qalmadıqlarını, vəkilləri ilə mütəmadi görüşə bildiklərini və sağlamlıqları ilə bağlı şikayətlərinin olmadığını diqqətə çatdırıblar.
Səfirliyin əməkdaşları tərəfindən məsələnin diqqət mərkəzində olduğu, onların lazımi hüquqi yardımla təmin olunacağı və hazırda bu istiqamətdə müvafiq işlərin davam etdirildiyi barədə həmyerlilərimizə məlumat verilib.
Sonra Toğrul Sadıqov və Müsənnif Dadaşov Məhərrəmkənd rayonunun icra başçısı Fərid Əhmədovla görüş keçirib, Dərbəndlə sərhəddəki Qullar ərazisində salınmış çadır şəhərciyinə gedərək buradakı şəraitlə tanış olublar.
Fərid Əhmədov çadır şəhərciyində yerləşən və Qullar kəndi ərazisində evlərdə yaşayan vətəndaşlarımızın sayı, onların vəziyyəti haqqında ətraflı məlumat verib.
Bu ağır dönəmdə sərhəddəki həmvətənlərimizə göstərdikləri yardım və dəstəyə görə Fərid Əhmədova və Dağıstan hökumətinə minnətdarlıq bildirilib.
Fəridə Abdullayeva
AZƏRTAC-ın xüsusi müxbiri
Moskva