İQTİSADİYYAT


Şəhərətrafı dəmir yollarında təmassız ödəniş sistemi tam şəkildə istifadəyə verilib YENİLƏNİB

Bakı, 2 iyun, AZƏRTAC

İyunun 2-də Mərkəzi Bank, “Azərbaycan Dəmir Yolları” QSC, “Visa” beynəlxalq kart təşkilatı və “Azərbaycan Beynəlxalq Bankı” ASC-nin birgə tərəfdaşlığı çərçivəsində şəhərətrafı dəmir yollarında gediş haqlarının təmassız ödəniş kartları ilə ödənilməsi layihəsinin real rejimdə istifadəyə verilməsinə həsr olunmuş açılış mərasimi keçirilib.

AZƏRTAC xəbər verir ki, tədbir vasitəsilə Bakı və Sumqayıt şəhərləri arasında sürətli sərnişin daşımalarını təmin edən Abşeron dairəvi dəmir yolunun bütün stansiyalarında ölkənin istənilən bankı tərəfindən emissiya olunmuş kartların sahibləri üçün təmassız ödəniş imkanının yaradılması ictimaiyyətin diqqətinə çatdırılıb.

Qeyd edək ki, sözügedən layihə Azərbaycan Respublikası Prezidentinin 2018-ci il 26 sentyabr tarixli Sərəncamı ilə təsdiq edilmiş “2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nda nəzərdə tutulan ictimai nəqliyyatda gediş haqlarının təmassız ödəniş kartları ilə ödənilməsi imkanının yaradılması tədbiri çərçivəsində Mərkəzi Bankın təşkilatçılığı ilə ötən il pilot rejimində start verilib. Layihənin birinci mərhələsində Bakı-Sumqayıt hərəkət xətti üzrə iki stansiyada gediş haqlarının təmassız bank kartları ilə ödənilməsi imkanı yaradılmış və ilk aylarda yalnız “Azərbaycan Beynəlxalq Bankı” ASC tərəfindən emissiya edilmiş təmassız kartlar vasitəsilə ödənişlərin qəbulu mümkün olmuşdur. Hazırda isə dairəvi dəmiryolu xəttinin 14 stansiyasında bütün bankların təmassız ödəniş alətlərindən istifadə etməklə gediş haqlarının nağdsız qaydada ödənilməsi imkanı mövcuddur.

Hər bir stansiyada 2 turniket üzrə gediş haqlarının təmassız bank kartlarından istifadə etməklə həyata keçirilməsi mümkündür. Layihənin növbəti mərhələsində istifadə sıxlığından asılı olaraq bank kartları ilə ödənişlərə imkan verən turniketlərin sayının ilin sonuna kimi artırılması nəzərdə tutulub.

Dəmir yollarında innovativ ödəniş həllərinin genişləndirilməsi sərnişinlərin rahatlığını təmin etməklə, əlavə lokal kartların alınması, bu kartların balansının terminallar vasitəsilə “doldurulması” zərurətini aradan qaldırır. Bu yenilik təmassız ödənişlərin əhali arasında daha böyük rəğbət qazanmasına və bununla da, təmassız ödəniş kartlarından istifadənin artması, rəqəmsal ödənişlərin əhatə dairəsinin genişlənməsi, son nəticədə isə rəqəmsal ödəniş mühitinin formalaşması və nağd iqtisadiyyatın həcminin azalmasına təkan verəcək. Eyni zamanda, dəmir yollarında nağdsız ödənişlərin qəbulu imkanının yaradılması layihəsinin uğurlu icrası analoji tədbirlərin ölkənin digər ictimai nəqliyyat növlərində də həyata keçirilməsi üçün əlverişli şərait yaradacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.