REGİONLAR
Şəhid Cavid Qarayevin ad günündə xatirəsi yad edilib VİDEO
Füzuli, 5 sentyabr, Aydın Yavərzadə, AZƏRTAC
44 günlük Zəfər yürüşündə qəhrəmancasına döyüşərək şəhid olan Cavid Qarayevin anadan olmasının 37-ci il dönümü qeyd edilib. Şəhidin məzarı başında keçirilən anım günündə onun qəhrəmanlıq dolu xatirəsi yad edilib, ruhuna dualar oxunub.
AZƏRTAC-ın bölgə müxbiri xəbər verir ki, Qarayev Cavid Əmirxan oğlunun anım mərasimində şəhidin ailəsi ilə bərabər Füzuli Rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin Füzuli rayon şöbəsinin əməkdaşları, Azərbaycan Respublikasının Dini Qurumlarla İş üzrə Dövlət Komitəsinin nümayəndəsi, kənd sakinləri, Vətən müharibəsi qaziləri iştirak ediblər. Şəhidin məzarı ziyarət olunub, üzərinə gül dəstələri düzülərək ruhuna dualar oxunub.
Çıxış edənlər Azərbaycan Ordusunun 44 gün ərzində yağı düşmən üzərində çaldığı Zəfərdən söhbət açıblar. Bildirilib ki, bu Qələbə Azərbaycan tarixinə yazılan şanlı bir səhifə olaraq xatırlanacaq və haqq döyüşünə qoşularaq canlarını fəda edən şəhidlərimiz daim bu tarixin əsl qəhrəmanları kimi yaddaşlarda qalacaq. Vurğulanıb ki, Vətən müharibəsində ölümün gözünə dik baxan igidlər bir amal uğrunda döyüşərək şəhadətə yüksəlməklə 30 illik Vətən həsrətinə son qoydu və hər biri dastan olmaqla yanaşı, həm də gələcək nəsillər üçün əsl örnək oldu. Diqqətə çatdırılıb ki, Cavid də indi həmin şanlı səhifədə özünə yer qazanıb.
Onun şərəfli ömür yolundan söz açan natiqlər bildiriblər ki, 1984-cü il sentyabrın 5-də Füzuli rayonu Kərimbəyli kəndində anadan olan Cavid uşaqlıq illərini də elə cəbhəyanı rayonda keçirərək Vətənpərvər ruhda yaşa dolub. O, yeniyetmə çağlarında belə torpağa, vətənə bağlı olması ilə seçilib. Ali təhsilini İdman Akademiyasında aldıqdan sonra həqiqi hərbi xidmətə ruh yüksəkliyi ilə yollanan Cavid xidməti dövründə də nizamlı əsgər olaraq seçilib. Xidmətini bitirdikdən sonra hərbçi olmaq arzusu ilə yaşayan Cavid 2016-cı il Aprel döyüşlərindən sonra öz istəyi ilə müraciət edərək müddətdən artıq xidmətçi olaraq Vətən keşiyində dayanıb. Nizam- intizamı ilə seçilən Cavid çavuş kimi manqa komandiri vəzifəsinə yüksəlib. Vətən müharibəsi zamanı əks hücumlarda Cavid və manqası ön sıralarda döyüşə qoşulub. Füzuli , Cəbrayıl, Xocavənd uğrunda gedən döyüşlərdə mərdliyi və qorxmazlığı ilə seçilən Cavid əsl qəhrəman kimi döyüşərək torpaqlarımızın azad edilməsi uğrunda mərdliklə vuruşub. Bir çox strateji yüksəkliklərin azad olunmasında fəallıq göstərən Cavid Qarayev və manqası düşmənin xeyli sayda canlı qüvvəsini və texnikasını zərərsizləşdirib. Oktyabr ayının 26-da gərgini döyüşlər zamanı Cavid şəhid olub.
Natiqlər şəhidin yaxınlarına Allahdan səbir, şəhidimizə isə rəhmət diləyiblər.
Qeyd edilib ki, Cavid Qarayev Vətən müharibəsində göstərdiyi şücaətə görə ölümündən sonra "Vətən uğurunda", "Füzulinin azad olunmasına görə", Xocavəndin azad olunmasına görə" medalları ilə təltif olunub.