Bakı, 16 iyul, AZƏRTAC

Doğma Qarabağın işğalçılardan azad olunması uğrunda canını fəda edən şəhidlərimizin ailələrinə diqqət və qayğı daim diqqət mərkəzində saxlanılır. Azərbaycan Prezidenti, Ali Baş Komandan İlham Əliyevin və Birinci vitse-prezident Mehriban xanım Əliyevanın müvafiq göstərişlərinə əsasən dövlət qurumları tərəfindən bu kateqoriyadan olan insanların problemləri ilə hər zaman yaxından maraqlanılır, onların qarşılaşdıqları çətinliklərin aradan qaldırılması məqsədilə genişmiqyaslı layihələr həyata keçirilir. Şəhid ailələri və müharibə əlilləri üçün yaşayış komplekslərinin, şəhərciklərin inşa edilməsi, reabilitasiya mərkəzlərinin istifadəyə verilməsi də bunun bariz ifadəsidir.

AZƏRTAC xəbər verir ki, bu fikirləri Milli Məclisin deputatı, YAP İdarə Heyətinin üzvü Rəşad Mahmudov söyləyib.

Rəşad Mahmudov deyib: “Azərbaycanda şəhid ailələri və müharibə əlillərinə həssas münasibət ümummilli liderimiz Heydər Əliyevin xalqın təkidi ilə yenidən ölkə rəhbərliyinə gəlməsi ilə başlayıb. Həmin vaxtdan prioritet istiqamətə çevrilən bu xətt möhtərəm dövlətimizin başçısı İlham Əliyevin prezidentlik fəaliyyətinin ötən dövründə daim diqqət mərkəzində saxlanılıb. Belə ki, təkcə son illər ərzində bu sahədə çox böyük işlər görülüb, 10 min şəhid ailəsi və müharibə əlili dövlət tərəfindən mənzillərlə, fərdi evlərlə təmin olunub. Azərbaycanda ötən il bu istiqamətdə mühüm layihələr gerçəkləşdirilib. Bunun nəticəsində 1572 şəhid ailəsi və Qarabağ qazisi evlərlə, mənzillərlə təmin edilib. Cari il isə bu kateqoriyadan olan 3 minədək şəxsin yaşayış sahəsinin yaxşılaşdırılması nəzərdə tutulub. Qarabağ qazilərinin fərdi avtomobillərlə təmin olunmasına da xüsusi diqqət yetirilib. Elə buna görədir ki, onlara ümumilikdə 7200 avtomobil verilib.

İyulun 14-də Binəqədi rayonunun Xocasən qəsəbəsində şəhid ailələri və müharibə əlillərinə mənzillərin və avtomobillərin təqdim olunması da bu istiqamətdə atılan növbəti mühüm addımlardan biri kimi diqqət çəkdi. Həmin mərasimdə iştirak edən dövlətimizin başçısına şəhid ailələri və müharibə əlillərinə göstərilən sosial dəstək və məşğulluq istiqamətində görülən işlər barədə ətraflı məlumat verilərək, şəhid ailələrinin üzvləri və müharibə veteranlarının aktiv məşğulluq tədbirləri çərçivəsində son 6 ayda 47 min 400 nəfər işlə təmin olunduğu, 7 min nəfərin özünüməşğulluq proqramına, 56 min nəfərin isə ictimai işlərə cəlb edildiyi bildirildi. Bundan başqa, mərasimdə 2018-2020-ci illərdə bu qəbildən olan vətəndaşların orta aylıq əməkhaqqının 30 faiz, orta aylıq pensiyasının isə 60 faiz artırıldığı vurğulandı.

Rəşad Mahmudov qeyd edib ki, Prezident İlham Əliyevin bu il yanvarın 25-də imzaladığı “Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması ilə bağlı bir sıra tədbirlər haqqında” sərəncamı da bu kateqoriyadan olan əhali qruplarına dövlət başçısının xüsusi qayğısının bariz ifadəsidir. Həmin sənəddə 2020-ci ildə ordumuzun həyata keçirdiyi hərbi əməliyyatlar zamanı şəhidlik zirvəsinə yüksələn qəhrəmanlarımızın ailələrinin və bu müharibə ilə əlaqədar əliliyi müəyyənləşdirilən şəxslərin də mənzil və ya fərdi evlə təminatı nəzərdə tutulur.

Dövlətimizin başçısının 2020-ci il 8 dekabr tarixli Fərmanı ilə Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək məqsədilə “YAŞAT” Fondunun yaradılması, Fond tərəfindən qısa müddətdə ciddi işlərin görülməsinə başlanılması nəticəsində davamlı olaraq müharibə əlilləri və şəhid ailələrinin, o cümlədən müharibə veteranlarının sosial vəziyyətinin yaxşılaşdırılması istiqamətində həyata keçirilən intensiv tədbirlər də artıq öz təsirli nəticələrini verməkdədir.

Bu gün qazilərimizin məşğulluq məsələləri də uğurla həll olunur və dövlətimizin başçısının çağırışına özəl sektor müsbət reaksiya verir. Bu, təbiidir. Çünki sözügedən sahənin inkişafı, sahibkarlığın daha da güclənməsi üçün dövlət çox böyük işlər görür. Bütün bunların qarşılığında isə özəl bölmədə sosial məsuliyyət aydın dərk edilir.

Beləliklə, özəl sektora qayğı son nəticədə ölkəmizin inkişafına, sosial rifahın daha da yaxşılaşmasına, yeni iş yerlərinin açılmasına hesablanıb. Bu baxımdan pandemiya şəraitində iş yerlərinin yaradılmasına, özünüməşğulluğun təmin olunmasına da prioritet istiqamət kimi yanaşılıb. Buna görə də Azərbaycanda əmək və məşğulluq sahəsində həyata keçirilən islahatlar nəticəsində əmək qanunvericiliyi beynəlxalq əmək normalarına uyğunlaşdırılıb, əmək bazarının təkmilləşdirilməsi, əmək münasibətlərinin sosial dialoq, kollektiv müqavilələr və sazişlərlə tənzimlənməsi istiqamətində uğurlu nəticələr əldə olunub.

Hazırda özünüməşğulluq proqramına cəlb olunan 16 min nəfər arasında artıq 5 mindən çox şəhid ailəsinin üzvləri və müharibə əlilləri vardır.

Sonda Rəşad Mahmudov müharibə əlilləri üçün ən müasir protezlər sifariş edildiyini və Vətən müharibəsinin 100-dək qazisinin artıq ən yüksək keyfiyyətli, dünyanın aparıcı firmalarının istehsalı olan protezlərlə təmin olunduğunu, bununla da onların normal həyata qaytarıldığını bildirib. Deputat, eyni zamanda, bu genişmiqyaslı işlərlə bərabər, 8400 nəfər müharibə iştirakçısına sosial ödənişlər verildiyini bildirib.