CƏMİYYƏT
Şəhidlərimiz son mənzilə yola salınıblar
Bakı, 6 aprel, AZƏRTAC
Ermənistan kriminal rejiminin təxribatının qarşısının alınması və mülki əhalinin təhlükəsizliyinin təmin olunması məqsədilə döyüşə atılmış və qəhrəmancasına həlak olmuş əsgər və zabitlərimiz böyük izdihamla son mənzilə yola salınıblar.
Qoşunların təmas xəttinin Tərtər-Goranboy istiqamətində erməni hərbi birləşmələrinin təxribatının qarşısını alarkən şəhid olan milli ordunun əsgəri Əzizzadə Xaliq Həsən oğlu son mənzilə yola salınıb.
1996-cı il təvəllüdlü şəhidimiz 2015-ci ildə Xətai Rayon Hərbi Komissarlığı tərəfindən həqiqi hərbi xidmətə çağırılmışdı. Şəhidin cənazəsi ötən gecə yaşadığı ünvana gətirilib. Yüzlərlə şəhər sakini qəhrəman Vətən övladını son mənzilə yola salmaq üçün onun yaşadığı evin qarşısına axın edib.
Naxçıvan Muxtar Respublikasının Şərur rayonunda anadan olan Xaliq Əzizzadə öz yaşıdları arasında vətənpərvərliyi ilə seçilib. O, Xətai rayon 116 saylı məktəbi bitirdikdən sonra hərbi xidmətə yollanıb. Cəbhənin Tərtər-Goranboy istiqamətində aprelin 4-dən 5-nə keçən gecə erməni hərbi birləşmələrinin təxribatının qarşısını alarkən şəhid olub.
Şəhidlərin son mənzilə yola salınması mərasimində “Qarabağ bizimdir, bizim olacaq”, “Şəhidlər ölməz, Vətən bölünməz” və başqa şüarlar səsləndirilib.
Cənazə namazı qılındıqdan sonra şəhidimiz Sabunçu rayonunun Kürdəxanı qəsəbəsindəki qəbiristanlıqda Azərbaycanın dövlət himninin sədaları altında dəfn olunub.
Şəhidin tabutu üzərindəki üçrəngli dövlət bayrağımız əbədi xatirə olaraq atasına təqdim edilib.
x x x
Təmas xəttində erməni təxribatı nəticəsində şəhid olan əsgərlərdən biri də paytaxtın Binəqədi rayon sakini, 1996-cı il təvəllüdlü Emin Bağırov olub. Şəhid əsgər doğulub boya-başa çatdığı Binəqədi qəsəbəsində son mənzilə yola salınıb. Onun dəfn mərasimində çıxış edən Binəqədi Rayon İcra Hakimiyyətinin başçısı Xaləddin İsgəndərov, Müdafiə Nazirliyinin rəsmiləri, kənd ağsaqqalları, ziyalılar, ictimaiyyət nümayəndələri Vətən uğrunda qəhrəmancasına şəhid olan Emin Bağırovun şücaətindən danışıblar. Milli ordunun əsgəri böyük izdihamla son mənzilə yola salınıb.
Şəhidə ehtiramını bildirmək üçün minlərlə rayon sakini küçələrə çıxıb. Onu son mənzilə yola salmağa gələn məktəblilər və rayon gəncləri “Şəhidlər ölməz, Vətən bölünməz”, “Qarabağ bizimdir, bizim olacaq” şüarları səsləndiriblər.
Şəhidin nəşi dəfn olunmaq üçün doğulduğu Binəqədi qəsəbəsindəki qəbiristanlığa gətirilib. Onun tabutu üzərindəki üçrəngli Azərbaycan bayrağı əbədi xatirə kimi atasına təhvil verilib.
Dəfn mərasimində Müdafiə Nazirliyinin hərbi orkestrinin ifasında Azərbaycanın dövlət himni səsləndirilib. Şəhidin xatirəsinə havaya yaylım atəşi açılıb.
x x x
Ana torpaq daha bir qəhrəman oğlunu - Xəzər rayonunun Mərdəkan qəsəbəsində böyüyüb boya-başa çatmış Kamran Faiq oğlu Şirəliyevi ağuşuna aldı. O, ömrünün 24-cü baharında canından çox sevdiyi Vətən üçün sinəsini düşmənə sipər edib. Torpağımızın erməni işğalından azad olunması üçün Ağdərə istiqamətində gedən döyüşlərdə qəhrəmancasına həlak olub.
Bu gün səhər saatlarında minlərlə insan Mərdəkan qəsəbəsinə axışırdı. Bu insan seli Vətən oğlunu son mənzilə yola salmağa gəlirdi.
Şəhidin cənazəsi Mərdəkandan Suraxanı qəsəbəsinə gətirilib. Burada ümumxalq sevgisi ilə qəhrəmanımız uğrunda canından keçdiyi müqəddəs torpağa tapşırıldı.
Şəhidin ruhuna dualar oxundu, hərbçilər tərəfindən xatirəsinə havaya yaylım atəşi açıldı.