SİYASƏT


Şəhidlərimizin xatirəsi Berlində yad edilib VİDEO

Berlin, 27 sentyabr, AZƏRTAC

27 Sentyabr - Anım Günü ilə bağlı Azərbaycanın Almaniyadakı səfirliyi tərəfindən Berlin şəhərində, əsası 1866-cı ildə qoyulmuş Şəhidlər Məscidində tədbir keçirilib. Şəhidlərimizin ruhuna dualar oxunub və ehsan verilib. Anım tədbirində ölkəmizin müstəqilliyi, suverenliyi və ərazi bütövlüyü uğrunda canlarından keçən şəhidlərimizə həsr olunmuş xatirə posteri yerləşdirilib.

AZƏRTAC xəbər verir ki, tədbirdə şəhidlərimizin əziz xatirəsi bir dəqiqəlik sükutla yad edilib. Sonra şəhidlərimizə həsr olunmuş videoçarxlar nümayiş etdirilib. Azərbaycanın Almaniyadakı səfiri Nəsimi Ağayev çıxış edərək 44 günlük Vətən müharibəsi zamanı Azərbaycan Ordusunun ölkəmizin ərazi bütövlüyünün bərpa olunması uğrunda göstərdiyi fədakar mübarizədən, əsgər və zabitlərimizin qəhrəmanlıqlarından bəhs edib. Diplomat bildirib ki, Azərbaycan Respublikasının Prezidenti, Müzəffər Ali Baş Komandan İlham Əliyevin qətiyyəti və müdrik rəhbərliyi nəticəsində silahlı qüvvələrimiz qısa müddətdə 30 ilə yaxın düşmən tapdağı altında qalan ərazilərimizi işğaldan azad edə bilib. N.Ağayev şəhidlərimizi daim böyük minnətdarlıq hissi ilə andığımızı və onların əziz xatirəsinin həmişə qəlbimizdə yaşayacağını bildirib.

Sonra Türkiyənin Almaniyadakı səfirliyinin müşavir-elçisi Umut Topçuoğlu çıxış edib. O, Türkiyənin həm Vətən müharibəsi dövründə, həm də ondan sonrakı dövrdə daima Azərbaycanın yanında olduğunu vurğulayıb, habelə Azərbaycan şəhidlərinə Allahdan rəhmət diləyib.

Anım tədbirində Türkiyənin Almaniyadakı səfirliyinin müşaviri Ayfer Fulya Yücekök və Türkiyənin Berlindəki baş konsulu Rıfkı Olgun Yücekök, Azərbaycanın Almaniyadakı səfirliyinin əməkdaşları, eləcə də Almaniyada fəaliyyət göstərən Azərbaycan və türk diasporunun nümayəndələri iştirak ediblər.

 
Vüqar Seyidov

AZƏRTAC-ın xüsusi müxbiri

Berlin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.