CƏMİYYƏT


Səhiyyə naziri “Stop Vərəm” Tərəfdaşlığının İdarə Heyətinin 35-ci toplantısında çıxış edib

Bakı, 20 may, AZƏRTAC

“Stop Vərəm” Tərəfdaşlığının İdarə Heyətinin 35-ci toplantısı keçirilir. Beynəlxalq qurumun budəfəki iclası onlayn formatda təşkil olunub.

AZƏRTAC-a Səhiyyə Nazirliyindən verilən məlumata görə, çıxışlarda Qlobal Plan İşçi Qrupunun sədri, iştirakçı ölkələrin səhiyyə nazirləri təəssüf hissi ilə qeyd ediblər ki, vərəm dünyada ən təhlükəli infeksiyalardan biri olaraq qalmaqdadır və hər gün 4100-dən çox insan bu xəstəlikdən vəfat edir.

Toplantının “Vərəmin maliyyələşdirilməsi mənbələri” mövzusuna həsr olunmuş panel sessiyasında Azərbaycanın səhiyyə naziri Teymur Musayev çıxış edib.

Nazir qeyd edib ki, 2012-ci ildən başlayaraq Azərbaycan hökuməti tərəfindən vərəmlə mübarizə üzrə Dövlət proqramları hesabına vərəmə qarşı davamlı olmayan dərmanların alınması və digər müvafiq xərclərin tam ödənilməsinə başlanılıb: “Eyni zamanda, 2005-ci ildən QİÇS, vərəm və malyariya ilə mübarizə üzrə Qlobal Fond Azərbaycanda vərəm əleyhinə fəaliyyətin maliyyələşdirilməsində yaxından iştirak edir. Hazırda Qlobal Fondun layihələri davamlı olaraq Azərbaycanda həyata keçirilir və vərəmlə mübarizəmizə böyük töhfə verir”.

“2020-ci ildən Azərbaycanda səhiyyənin maliyyələşdirilməsinin yeni mexanizmi – icbari tibbi sığorta tətbiq edilir. Onun həyata keçirilməsi koronavirus pandemiyasına təsadüf etməsinə baxmayaraq, ilkin nəticələr ümidvericidir. İcbari tibbi sığortanın tətbiqi planı səhiyyə modullarının tədricən fayda paketinə daxil edilməsini nəzərdə tutur. Vərəmlə mübarizə qlobal məsələdir və biz birlikdə əməkdaşlıq edərək, eyni zamanda təcrübəmizi bölüşərək daha çox müsbət nəticələr əldə edə bilərik”, - deyə Teymur Musayev fikrini tamamlayıb.

Mayın 15-dən keçirilən “Stop Vərəm” Tərəfdaşlığının İdarə Heyətinin 35-ci toplantısı bu gün yekunlaşacaq.

 

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.