SİYASƏT
Şəkərabad - Babək qəsəbə - Nehrəm - Arazkənd dairəvi avtomobil yolunun ikinci hissəsi istifadəyə verilib
Babək, 11 noyabr, AZƏRTAC
Noyabrın 11-də Şəkərabad - Babək qəsəbə - Nehrəm - Arazkənd dairəvi avtomobil yolunun ikinci hissəsi istifadəyə verilib.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, Naxçıvan Muxtar Respublikası Ali Məclisinin Sədri Vasif Talıbov yolun açılışını bildirən lenti kəsib, sakinləri təbrik edərək deyib: Hər bir yaşayış məntəqəsinin inkişafında müasir yol infrastrukturunun yaradılması vacib məsələdir. Çünki harada yol abaddırsa, orada həyat rahatdır. Bu gün yaşayış məntəqələrində insanlar avtomobildən istifadə edir. Bunun üçünsə, ilk növbədə rahat yol olmalıdır. Bu amili nəzərə alan ölkə Prezidenti cənab İlham Əliyev 2014-cü il avqustun 27-də müvafiq Sərəncam imzaladı. Sərəncama əsasən Azərbaycanın ən böyük kəndlərindən biri olan Nehrəm kəndinin yolları yenidən quruldu. Yolun birinci hissəsinin açılışı 2015-ci il dekabrın 1-də həyata keçirildi. Bu gün isə yolun ikinci hissəsi istifadəyə verilir.
Ali Məclisin Sədri deyib: Yoldan səmərəli istifadə etmək, onu qorumaq bundan sonra sakinlərin üzərinə düşən vəzifədir. Nehrəm kəndində yolun yenidən qurulması ilə yanaşı, ibadət yerləri və digər sosial obyektlər istifadəyə verilmiş, torpaq sahələrinin su təminatı yaxşılaşdırılmışdır. Hazırda kənddə yeni su və kanalizasiya sistemləri çəkilir. Bütün bu tədbirlərin həyata keçirilməsi Nehrəmdə insanların rahat yaşamasına xidmət edir.
Ali Məclisin Sədri sakinləri bir daha təbrik edib, onlara gələcək işlərində uğurlar arzulayıb.
Nehrəm bələdiyyəsinin sədri Tofiq Abutalıbov çıxış edərək deyib ki, Ümummilli Liderimizin müəyyənləşdirdiyi siyasi xəttin uğurla davam etdirilməsi muxtar respublikanın bütün yaşayış məntəqələrini inkişaf və tərəqqiyə qovuşdurub. Bu inkişafdan Nehrəm kəndinə də pay düşüb. Artıq Nehrəm öz tarixinin yeni inkişaf dövrünü yaşayır. Son illər kənddə geniş abadlıq-quruculuq işləri aparılıb, xəstəxana binası, 3 tam orta məktəb, kənd mərkəzi, uşaq musiqi məktəbi, ticarət mərkəzi və digər sosial obyektlər istifadəyə verilib. Kənd tamamilə qazlaşdırılıb, dayanıqlı elektrik enerjisi və müasir rabitə sistemi ilə təmin olunub, qapalı suvarma şəbəkəsi qurulub. Yolun yenidən qurulması da bu sahədə görülən işlərin davamıdır. Tofiq Abutalıbov həyata keçirilən tədbirlərə görə Nehrəm sakinləri adından Azərbaycan Respublikasının Prezidenti İlham Əliyevə minnətdarlığını bildirib.
Sonra Ali Məclisin Sədri yolda görülən işlərlə maraqlanıb. Bildirilib ki, 31 min nəfərdən çox əhalinin yaşadığı 7 yaşayış məntəqəsini əhatə edən Şəkərabad - Babək qəsəbə - Nehrəm - Arazkənd dairəvi avtomobil yolunun ikinci hissəsinin uzunluğu 9,6 kilometrdir. Tikinti işləri zamanı yol yatağı genişləndirilərək yeni asfalt örtük çəkilib, 26 su keçidi qoyulub, 5,5 kilometrlik Nehrəm kənddaxili avtomobil yolu yenidən qurulub.
Nehrəmdə yeni məscid tikilib
Nehrəm kəndində tarixən elmin, təhsilin inkişafı ilə yanaşı, dini-mənəvi dəyərlərimizə də hörmətlə yanaşılıb. Kənddə bu gün də dini dəyərlərimiz qorunub yaşadılır, dindarlar üçün lazımi şərait yaradılır. Bu sahədə görülən işlərin davamı olaraq Nehrəm kəndində yeni məscid tikilib.
Noyabrın 11-də Nehrəm kənd məscidi istifadəyə verilib.
Naxçıvan Muxtar Respublikası Ali Məclisinin Sədri Vasif Talıbov tədbirdə çıxış edərək deyib: Nehrəm kəndinin bu ərazisində əvvəllər də məscid olmuş, uzun illər azan səsi eşidilmiş, insanlar burada ibadət etmişlər. Bu gün isə kənddə yeni məscid tikilmiş, dindarlar üçün lazımi şərait yaradılmışdır.
Ali Məclisin Sədri təşkilatçılara təşəkkür edib, dindarları və kənd sakinlərini təbrik edərək deyib: İslam aləminin müqəddəs simvolları vardır. Peyğəmbərimiz, Qurani-Kərim və məscidlər İslam dininin üç əsas simvoludur. Məscidlər ibadət yeri olmaqla yanaşı, həm də mənəvi dəyərlərimizin yaşadıldığı məkanlardır. Bu gün istifadəyə verilən məscid binası islami dəyərlər əsasında qurulmuşdur. Məsciddə İslam dini və mənəvi dəyərlərimiz gələcək nəsillərə olduğu kimi öyrədilməli, saf əməllər naminə ibadətlər olunmalıdır. Məscidlər müqəddəs yerlərdir. Bu səbəbdən də Nehrəm kənd məscidi mənəvi dəyərlərimizin yaşadıldığı yer kimi qorunmalı, təmiz saxlanmalıdır.
Ali Məclisin Sədri deyib: Bu gün Azərbaycanda sabitlik və inkişaf vardır. Ölkəmizin hər bir yerində quruculuq işləri aparılır. Görülən işlərin, mövcud inkişafın və sabitliyin əsası isə ulu öndərimiz Heydər Əliyev tərəfindən qoyulmuşdur. Bu gün Ümummilli Liderin yolu ölkə Prezidenti tərəfindən uğurla davam etdirilir, hər bir vətəndaşa ölkəmizin inkişafından pay düşür. Hazırda dünyanın bəzi ölkələrində müharibələr gedir, məscidlər və dini abidələr dağıdılır. Lakin bu gün Azərbaycanda sabitlikdir, bütün sahələr inkişaf etdirilir, məscidlər, yollar və digər sosial obyektlər istifadəyə verilir, dini-mənəvi dəyərlərimiz qorunub yaşadılır.
Ali Məclisin Sədri dindarları və sakinləri yeni məscidin istifadəyə verilməsi münasibətilə bir daha təbrik edib.
Kənd sakini, dindar Yusif Nağıyev minnətdarlıq edərək deyib ki, Naxçıvan Muxtar Respublikası yeni inkişaf dövrünü yaşayır. 70 il Sovetlər Birliyi dövründə görülməyən işlər müstəqillik illərində Naxçıvanda həyata keçirilib. Babək rayonunun Nehrəm kəndi də inkişaf edir, dəyişir. İstifadəyə verilən sosial obyektlər, çəkilən yol sakinlərin rahatlığını təmin edir. Bu işlərin davamı kimi məscid binasının istifadəyə verilməsi sakinlərin böyük sevincinə səbəb olub. Muxtar respublikada dini dəyərlərimizin qorunub yaşadılması istiqamətində həyata keçirilən tədbirlər göz önündədir. Ziyarətgahlar bərpa olunur, yeni məscidlər tikilir, dindarlar üçün lazımi şərait yaradılır. Yusif Nağıyev həyata keçirilən tədbirlərə görə Nehrəm kənd dindarları adından minnətdarlıq edib.
Sonra Ali Məclisin Sədri və tədbir iştirakçıları məscid binasında yaradılan şəraitlə tanış olublar.
Bildirilib ki, sahəsi 830 kvadratmetr olan məscid zal və minarədən ibarətdir. İki hissədən ibarət olan zalda qadın və kişilərin ayrı-ayrılıqda ibadət etməsi üçün şərait yaradılıb, məscidin daxili milli və dini ornamentlərlə, naxışlarla bəzədilib, divarlara Qurani-Kərimdən ayələr həkk olunub. Burada 570 nəfər eyni vaxtda ibadət edə bilər. Məsciddə yardımçı otaqlar da istifadəyə verilib, dəstəmaz yeri yaradılıb, elektrik, qaz və su xətti çəkilib, həyət abadlaşdırılıb.
Sonra məsciddə ilk namaz qılınıb, ümummilli liderimiz Heydər Əliyevin və şəhidlərimizin ruhuna dualar oxunub, ölkə Prezidentinə uzun ömür, cansağlığı arzulanıb.