REGİONLAR
Şəki Regional Aqrar Elm və İnnovasiya Mərkəzi taxılçı fermerlər üçün təlimlər təşkil edib
![](/files/galleryphoto/2021/1/1200x630/16165737101630664342_1200x630.jpg)
![](/files/galleryphoto/2021/1/1200x630/16165737101401659690_1200x630.jpg)
![](/files/galleryphoto/2021/1/1200x630/16165737105434651537_1200x630.jpg)
Şəki, 24 mart, Mustafa Dadaşov, AZƏRTAC
Kənd Təsərrüfatı Nazirliyinin Aqrar Elm və İnnovasiya Mərkəzinin tabeliyində fəaliyyət göstərən Şəki Regional Aqrar Elm və İnnovasiya Mərkəzi taxılçılıqla məşğul olan fermerlərə “Taxıl əkinlərində xəstəlik və ziyanvericilərə qarşı mübarizə işləri və təhlükəsizlik tədbirlərinin təşkili” mövzusunda təlimlər keçirir.
Regional Mərkəzdən AZƏRTAC-ın bölgə müxbirinə bildirilib ki, Şəki rayonunun Daşüz kəndində keçirilən təlimdə mütəxəssislər tərəfindən fermerlərə payızlıq taxıl sahələrində xəstəlik və zərərvericilərin vaxtında aşkar edilməsinin, inkişaf mərhələsinin düzgün təyin olunmasının aparılan mübarizə tədbirlərinin səmərəliliyinə müsbət təsiri barədə ətraflı məlumat verilib.
Təlimlərdə fermerlərə, həmçinin siçanabənzər gəmiricilərə və digər xüsusi təhlükəli zərərvericilərə qarşı mübarizə tədbirlərini həyata keçirən zaman təhlükəsizlik qaydalarına əməl olunması, mübarizə aparılan sahənin kənarında xəbərdaredici nişanların qoyulması, mübarizə tədbirlərini həyata keçirən işçilərin fərdi mühafizə vasitələri ilə təmin edilməsinin vacibliyi barədə təlimatlar da verilib. Diqqətə çatdırılıb ki, səpin zamanı xəstəlik və zərərvericilərə qarşı davamlı sortlardan istifadə edilməsi, səpin normasına və səpin müddətinə düzgün əməl olunması bitkinin normal qışlamasına müsbət təsir göstərir.
Təlim prosesində mərkəzin mütəxəssisləri tərəfindən fermerləri maraqlandıran suallar cavablandırılıb.