ELM VƏ TƏHSİL


Şəki Regional Elmi Mərkəzi fəaliyyətini fundamental tədqiqatların prioritet istiqamətləri üzərində qurub

Bakı, 7 dekabr, AZƏRTAC

AMEA-nın Şəki Regional Elmi Mərkəzinin (ŞREM) illik ümumi yığıncağı keçirilib.

Akademiyadan AZƏRTAC-a bildirilib ki, tədbirdə ŞREM-in direktoru, fizika-riyaziyyat üzrə fəlsəfə doktoru, dosent Yusif Şükürlü çıxış edərək AMEA Rəyasət Heyətinin 2018-ci il 23 noyabr tarixli sərəncamından irəli gələn vəzifələrin yerinə yetirilməsi ilə bağlı məlumat verib. O, AMEA-nın prezidenti, akademik Akif Əlizadə tərəfindən imzalanmış sənədin elmi idarəetmənin səmərəli təşkili, işçilərin işə davamiyyətinə, əmək və icra intizamına nəzarətin gücləndirilməsi və iş vaxtının uçotunun aparılmasının təmin olunması məqsədi daşıdığını deyərək, bu istiqamətdə nəzarətin gücləndirilməsinin zəruriliyini qeyd edib.

Sonra mərkəzin elmi işlər üzrə direktor müavini, biologiya üzrə fəlsəfə doktoru Fərhad Əzizov ŞREM-in 2018-ci ildəki elmi və elmi-təşkilati fəaliyyəti barədə ətraflı məlumat verib. Alim mərkəzin fəaliyyətinin fundamental və tətbiqi tədqiqatların prioritet istiqamətləri üzərində qurulduğunu bildirib.

Tədbirdə ayrı-ayrı şöbələr üzrə əldə olunmuş elmi nəticələr müzakirə edilib, alınmış mühüm nəticələrin ŞREM-in illik hesabatına daxil edilməsi qərara alınıb. Həmçinin bu qurumun həmkarlar təşkilatının sədri C.Məmmədovun illik hesabatı dinlənilib. C.Məmmədov il ərzində yerinə yetirilən mədəni-kütləvi tədbirlər, təşkilati fəaliyyət, eyni zamanda, ŞREM-in strukturuna daxil olan təsərrüfat sahələrində görülən işlərlə bağlı ətraflı məlumat verib.

Yığıncaqda ŞREM-in təşkilati fəaliyyəti müzakirə olunub, beynəlxalq və ölkə üzrə AMEA-nın strukturuna daxil olan digər təşkilatlarla bağlanmış birgə elmi-texniki fəaliyyətə dair müqavilələrdə nəzərdə tutulmuş işlərin hesabatlarının hazırlanması şöbə rəhbərlərinə həvalə olunub.

Sonda illik fəaliyyətin qənaətbəxş olunmasına dair yekun qərar qəbul edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.