Şəki-Oğuz, 16 noyabr, Mustafa Dadaşov, AZƏRTAC

“Ölkəmizi tanıyaq” devizi ilə keçirilən tur-aksiyaya qoşulan Şəki məktəblilərindən ibarət qrup noyabrın 16-da səhər saatlarında Quba-Qusar-Xaçmaz marşrutu üzrə yola salınıb.

AZƏRTAC xəbər verir ki, bu münasibətlə keçirilən görüşdə çıxış edən şəhər icra hakimiyyətinin başçısı Elxan Usubov dövlətimizin başçısının tapşırığına əsasən reallaşan tur-aksiyaların gənc nəslin əsl vətəndaş kimi formalaşmasında mühüm əhəmiyyətə malik olduğunu vurğulayıb. Bildirilib ki, şəkili məktəblilər dörd gün ərzində şimal bölgəsinin tarixi məkanları ilə yaxından tanış olacaq, görməli yerlərini gəzəcək, istehsal müəssisələrinə baş çəkəcəklər. Məktəblilər, eyni zamanda, marşrut boyunca yerləşən şəhər və rayonlarımızda gedən tikinti-quruculuq işlərinin, iqtisadi tərəqqinin canlı şahidi olacaq, yurdumuzun gözəlliklərini əyani şəkildə görəcəklər.

Məktəblilərin diqqətinə çatdırılıb ki, Quba-Qusar-Xaçmaz bölgəsində də son illər aqrar sahənin, emal müəssisələrinin, xüsusən də turizm sənayesinin inkişafı istiqamətində böyük işlər görülüb. Bu bölgə həm də tarixi məkanları ilə tanınır. Aksiya iştirakçıları bütün bunlar barədə məlumat alacaq, eyni zamanda, Quba Soyqırımı Memorial Kompleksində erməni vəhşiliyinin əyani şahidi olacaqlar.

Bildirilib ki, Azərbaycanın bu dilbər guşəsi multikultural ənənələri ilə də seçilir. Bölgədə müxtəlif xalqların nümayəndələri əsrlərdən bəri dinc şəraitdə yaşayır, həm öz mədəniyyətlərini, həm də Azərbaycan xalqının mədəniyyətini zənginləşdirirlər. Yəhudilərin sıx məskunlaşdığı Qırmızı qəsəbəyə, Quba xalçaçılıq emalatxanasına, Cümə məscidinə, Tağlı körpüyə, Xınalıq yolundakı şəlaləyə, qolf meydançasına ekskursiyalar məktəblilərin yaddaşında silinməz izlər qoyacaq.

Şəhər icra hakimiyyətinin binası qarşısında keçirilən yolasalma mərasimində icra hakimiyyətinin məsul nümayəndələri, müəllim və valideynlər iştirak ediblər.

Qrup rəhbəri, icra hakimiyyətinin məsul əməkdaşı Günəş Əzimova AZƏRTAC-a bildirib ki, “Ölkəmizi tanıyaq” layihəsi gənclərin dünya görüşünün formalaşdırılmasında mühüm rol oynayır. Tur-aksiyanın hazırki mərhələsinin ilk turunda respublikamızın 11 şəhər və rayonundan olan 360 məktəbli Şəkinin tarixi məkanları ilə tanış olmaq imkanı əldə edib. Noyabrın 16-da startı verilən ikinci turda isə bu qədim diyara daha 9 rayondan məktəblilər yola düşür.

Şəhərdəki 10 nömrəli tam orta məktəbin 9-cu sinif şagirdi Aytac Yusifova sevincini belə ifadə edib: “Bu gün ölkəmizin gözəl guşələrindən birinə yola düşürük. Şimal bölgəsinin füsunkar təbiətini, qədim tarixi abidələrini öz gözlərimizlə görəcəyik. Bu layihə dövlətimizin başçısının biz gənclərə verdiyi dəyərin ifadəsidir”.

Sonra tur-aksiya iştirakçıları onlar üçün ayrılmış avtobusa əyləşərək marşrut üzrə yola düşüblər.

X X X

“Ölkəmizi tanıyaq” devizi ilə keçirilən maarifləndirici tur-aksiyaya Oğuz məktəbliləri də böyük həvəslə qoşulublar.

AZƏRTAC xəbər verir ki, şimal bölgəsinə yola düşəcək tur-aksiya iştirakçıları bir gün öncə ümummilli lider Heydər Əliyevin abidəsi önünə gül dəstələri düzərək, dahi rəhbərin xatirəsini ehtiramla yad ediblər.

Rayon icra hakimiyyətində keçirilən görüşdə icra hakimiyyətinin başçısı Eyvaz Qurbanov çıxış edərək, dövlətimizin başçısının tövsiyəsinə əsasən reallaşan tur-aksiyanın əhəmiyyətindən, ölkəmizdə təhsilin inkişafına göstərilən dövlət qayğısından, həmçinin respublikamızın sosial-iqtisadi inkişafının sürətləndirilməsi, əhalinin rifahının yaxşılaşdırılması istiqamətində həyata keçirilən davamlı tədbirlərdən bəhs edib. Məktəblilərin tur-aksiya zamanı Oğuz rayonunu uğurla təmsil edəcəklərinə əminlik ifadə olunub.

Tur-aksiya iştirakçıları sonra IDEA İctimai Birliyinin təşəbbüsü keçirilən ağacəkmə aksiyasında iştirak ediblər.

Rayon icra hakimiyyətinin binası qarşısında keçirilən yolasalma mərasimində icra hakimiyyəti başçısının müavini Yusif Naxçıvanski çıxış edərək, tur-aksiyanın əhəmiyyətindən söhbət açıb. Bildirib ki, məktəbliləri dörd gün ərzində Quba, Qusar və Xaçmaz rayonlarında çox maraqlı ekskursiyalar gözləyir. Onlar bu rayonların tarixi məkanları, muzeyləri ilə yaxından tanış olacaq, görməli yerlərini gəzəcəklər. Bundan əlavə, tur-aksiya iştirakçılarının asudə vaxtlarının mənalı və səmərəli keçməsi üçün müxtəlif intellektual oyunların, bilik yarışlarının, əyləncəli proqramların təşkili də nəzərdə tutulub.

Rayon rəhbərliyinin və valideynlərin xeyir-duasından sonra məktəblilər onlar üçün ayrılmış avtobusla Quba-Qusar-Xaçmaz marşrutu üzrə yola düşüblər.