Şəki, 26 yanvar (AZƏRTAC). Şəki şəhərində qəza vəziyyətində olan yaşayış evlərindən köçürülən sakinlər üçün inşa edilən 24 mənzilli yeni binanın cari ilin birinci yarısında istifadəyə verilməsi nəzərdə tutulmuşdur.

AZƏRTAC xəbər verir ki, dövlət vəsaiti hesabına inşa edilən 4 mərtəbəli binanın tikintisinə 2011-ci ilin sonunda başlanmışdır. Binadakı mənzillər iki və üçotaqlıdır. İndiyədək burada 1 milyon 300 min manatlıq tikinti-quraşdırma işləri görülmüşdür. Binanın dam örtüyü quraşdırılmış, ilk üç mərtəbədə qapı-pəncərə qoyulmuşdur. Hazırda binadaxili tikinti işləri görülür. Tikinti işlərinin tamamlanması üçün cari ildə 660 min manat vəsait ayrılmışdır. Tikinti işlərini “Əfqan” firmasının inşaatçıları yerinə yetirir.