Şəkili fermer: Bölgələrdə müasir toxumtəmizləmə avadanlığının quraşdırılmasına ehtiyac var

Şəki, 18 sentyabr, Mustafa Dadaşov, AZƏRTAC

Şəkili fermer Məmməd Hacıyev uzun illərdir ki, taxılçılıq və toxumçuluqla məşğul olur. Son dövrlər respublikamızda toxumçuluğun inkişafına xidmət edən qərarların qəbul olunması, bu sahəyə dövlət dəstəyinin gücləndirilməsi, Prezident İlham Əliyevin müvafiq Sərəncamı ilə Toxum Fondunun yaradılması toxumçuluqla məşğul olan digər istehsalçılar kimi, şəkili fermerin də ürəyincədir.

Məmməd Hacıyev AZƏRTAC-ın bölgə müxbirinə müsahibəsində bitkiçilik sahəsində məhsuldarlığın artmasında keyfiyyətli toxumun əsas amillərdən biri olduğunu vurğulayaraq deyib: “Kənd təsərrüfatının inkişafına dövlət dəstəyinin gücləndirilməsi toxumçuluqla məşğul olan fermerləri də ruhlandırıb. Məhsul istehsalçıları da, öz növbəsində, dövlətimizin qayğısına əməli işləri ilə cavab verməyə çalışıb, təsərrüfat ilində yüksək göstəricilərə nail olublar. Mənim özümün istifadəmdə toxumçuluq üçün yararlı 200 hektar əkin sahəm var. Ötən mövsüm 170 hektar sahədə toxumluq buğda, 30 hektar sahədə isə arpa əkdim. Buğda sahəsinin hər hektarından 40-45 sentner, arpa sahəsindən isə 45-50 sentner toxumluq məhsul götürməyə nail oldum. Gələn ilin məhsulu üçün əkin sahəsini daha 30 hektar artırmağı planlaşdırıram. Toxum səpiləcək bütün sahələrdə keyfiyyətli şum aparılıb və səpinə tam hazırıq”.

Şəkili fermer bildirib ki, peşəsi ilə əlaqədar olaraq istər ölkə daxilində, istərsə də respublikadan kənarda toxumçuluqla məşğul olan təsərrüfat rəhbərləri ilə daim əlaqə saxlayır, əməkdaşlıq edir.

Keyfiyyətli toxum istehsal etmək üçün toxumçu fermerlərin müasir texnoloji avadanlığa böyük ehtiyacı olduğunu bildirən Məmməd Hacıyev deyib: “Dövlətin dəstəyi ilə bu yaxınlarda Elmi-Tədqiqat Əkinçilik İnstitutunun Zaqatala Bölgə Təcrübə Stansiyasında ən müasir toxumtəmizləmə qurğusu quraşdırılıb. Toxumçuluğa aid bütün proseslər burada elmi cəhətdən əsaslandırılmış şəkildə həyata keçirilir. Yəni, bu avadanlığın köməyi ilə toxumun təmizlənməsi, dərmanlanması və qablaşdırılması prosesi aparılır. Bu avadanlığın imkanlarından bütün fermerlər yararlana bilərlər. Arzumuz budur ki, belə toxumtəmizləyən qurğular gələcəkdə respublikanın taxılçılıqla, toxumçuluqla məşğul olan digər regionlarında da quraşdırılsın. Fermerlər istədikləri vaxt belə qurğulardan istifadə etməklə yüksək keyfiyyətli toxum hazırlaya bilsinlər”.