QAN YADDAŞI
Şəkili gənclər Xocalı faciəsi qurbanlarının xatirəsini anıblar
Şəki, 26 fevral, Mustafa Dadaşov, AZƏRTAC
Tariximizin ən qanlı səhifələrindən olan Xocalı faciəsinin iyirmi doqquzuncu ildönümü Şəki rayonunun gəncləri tərəfindən silsilə tədbirlərlə anılır.
AZƏRTAC-ın bölgə müxbiri xəbər verir ki, faciənin ildönümü ilə əlaqədar Şəki Şəhər Gənclər və İdman İdarəsinin təşkilatçılığı ilə onlayn formatda keçirilən “Qan yaddaşımız – Xocalı” adlı tədbirin əvvəlində soyqırımı qurbanlarının və Azərbaycanın ərazi bütövlüyü uğrunda şəhid olan soydaşlarımızın xatirəsi bir dəqiqəlik sükutla yad edilib.
Tədbirdə gənclər və idman idarəsinin rəisi Daşqın Mikayılov çıxış edərək, ermənilərin zaman-zaman azərbaycanlılara qarşı törətdikləri vəhşiliklər, xalqımızın tarixinə qanla yazılan Xocalı faciəsinin dəhşətli nəticələri, soyqırımı ilə bağlı həqiqətlərin dünya ictimaiyyətinə çatdırılması istiqamətində görülən işlər barədə ətraflı məlumat verib. Vətən müharibəsində qazanılan tarixi Qələbə barədə danışan idarə rəisi Prezident İlham Əliyev tərəfindən həyata keçirilən tədbirlər nəticəsində erməni təcavüzü nəticəsində doğma yurd-yuvalarından didərgin düşmüş soydaşlarımızın tezliklə öz ata-baba torpaqlarına, o cümlədən Xocalıya qayıdacaqlarına əmin olduğunu bildirib.
Tədbirdə rayonun Çələbixan məcburi köçkün qəsəbəsində fəaliyyət göstərən Xocalı şəhər 3 saylı tam orta məktəbin direktoru Eldəniz Məhərrəmov, şəhər icra hakimiyyətinin əməkdaşı Anar Məmmədov, Şəki Heydər Əliyev Mərkəzinin elmi işçisi Rəvanə Rəhimova və başqaları çıxış edərək, erməni millətçilərinin xalqımıza qarşı zaman-zaman həyata keçirdikləri soyqırımı siyasətindən bəhs edib, Xocalı faciəsinin acı nəticələrini konkret faktlarla diqqətə çatdırıblar.
Tədbirin sonunda Xocalı məktəbinin şagirdləri Vətənə və doğma şəhərlərinə həsr olunan şeirlər ifa ediblər.