Şəmkir, 13 noyabr, AZƏRTAC

Şəmkir maşın kanalının nasos stansiyalarının suvermə qabiliyyətinin artırılması və onun birinci növbəsinin təmir-bərpası, nasos stansiyalarının xarici və daxili elektrik təchizatı üzrə işlər tamamlanıb. Nasos stansiyası binalarının təmir-bərpa işləri isə yekunlaşmaq üzrədir.

AZƏRTAC-ın bölgə müxbiri xəbər verir ki, 1989-cu ildə inşa edilən, əsas su mənbəyi Kür çayı üzərindəki Şəmkir su anbarı olan Şəmkir-Samux-Goranboy magistral suvarma kanalına saniyədə 57 kubmetr suyun verilməsi üçün 1-ci və 2-ci pillə nasos stansiyalarının hər pilləsində nəzərdə tutulmuş 9 nasos aqreqatından üçü artıq quraşdırılıb. Suyun kanala ötürülməsi məqsədilə hər birinin uzunluğu 7315 metr olan üçxətli boru kəmərinin bir xətti tikilərək istismara verilib.

Şəmkirçay su anbarı işə salındıqdan sonra Şəmkir-Samux-Goranboy magistral suvarma kanalına əlavə su verilməsinə baxmayaraq, onun ikinci növbəsinin tikintisi ilə əlaqədar həmin rayonların əkin sahələrinin, eləcə də layihə zonasına daxil olmayan ərazilərdə yeni yaradılan aqroparkları və iri təsərrüfatları etibarlı suvarma suyu ilə təmin etmək üçün Kür çayından su verilməsi məqsədilə mövcud nasos stansiyasının hər bir pilləsində 3 nasosun quraşdırılması və uzunluğu 7315 poqonometr olan basqılı boru kəmərinin 2-ci xəttinin tikintisi vacib idi. Bunun üçün Azərbaycan Respublikası Prezidentinin müvafiq sərəncamları ilə obyektin layihələndirilməsinə və tikintisinə başlanılıb. Maşın kanalında layihə üzrə nəzərdə tutulan işlər həyata keçirildikdən sonra Şəmkir-Samux-Goranboy rayonlarının 76506 hektar sahəsi suvarma suyu ilə təmin olunacaq.

Nasos stansiyasını qidalandıran Şəmkir su anbarından su buraxan qurğuda və qapılarda da təmir-bərpa işləri aparılıb. Hazırda obyektin istismara verilməsi üzrə yekun tamamlanma işləri görülür və ilin axırına yekunlaşması nəzərdə tutulur. İşlər başa çatdıqdan sonra Şəmkirdə 12065 hektar, Samuxda 14762 hektar, Goranboyda 49679 hektar suvarılan ərazilərin su təminatı yaxşılaşacaq, həmçinin 19348 hektar yeni sahənin suvarılması mümkün olacaq.