REGİONLAR
Şəmkirdə Yeni Azərbaycan Partiyasının yaranmasının 25 illik yubileyi qeyd olunub
Şəmkir, 13 noyabr, Famil Quliyev, AZƏRTAC
Yeni Azərbaycan Partiyası (YAP) respublikanın aparıcı siyasi qüvvəsidir. Olduqca çətin şəraitdə yaranan partiya qısa müddətdə böyük siyasi qüvvə kimi formalaşdı və yüz minlərlə insanı öz ətrafında birləşdirdi.
AZƏRTAC xəbər verir ki, bu fikirlər Şəmkirdə Yeni Azərbaycan Partiyasının yaranmasının 25 illiyi ilə əlaqədar keçirilən tədbirdə səsləndirilib.
Əvvəlcə ulu öndər Heydər Əliyevin abidəsi önünə tər çiçək dəstələri düzülüb, dahi rəhbərin xatirəsi ehtiramla yad edilib.
Tədbirdə YAP Şəmkir rayon təşkilatının sədri Fəxrəddin Vəliyev, rayon icra hakimiyyətinin başçısı Alimpaşa Məmmədov, Milli Məclisin deputatları Sahibə Qafarova, Sona Əliyeva, Naqif Həmzəyev, YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə, YAP Mərkəzi Aparatının məsul işçisi Rəfael Gülməmmədov, qonşu rayonların YAP rayon-şəhər təşkilatlarının sədrləri, rayon hüquq-mühafizə orqanlarının, idarə, müəssisə və təşkilatların rəhbərləri, ilk partiya təşkilat sədrləri və YAP fəalları iştirak ediblər.
Tədbir YAP-ın yaranmasının 25-ci ildönümünə həsr olunmuş filmin nümayişi ilə başlayıb.
YAP Şəmkir rayon təşkilatının sədri Fəxrəddin Vəliyev və rayon icra hakimiyyətinin başçısı Alimpaşa Məmmədov çıxış edərək bildiriblər ki, tarixi zərurətdən yaranan Yeni Azərbaycan Partiyası 25 il ərzində şərəfli yol keçib. YAP böyük çətinliklərə sinə gərərək həyata keçirdiyi uğurlu siyasətlə xalqın partiyası imicini qazanıb. Partiyanın qurucusu ümummilli lider Heydər Əliyevin və onun layiqli davamçısı Prezident İlham Əliyevin rəhbərliyi ilə ölkə həyatının bütün sahələrində aparılan ardıcıl və köklü islahatlar, yürüdülən daxili və xarici siyasət xalqımızın rifah halının yaxşılaşmasına, dövlətçiliyimizin daha da möhkəmlənməsinə zəmin yaradıb.
YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə çıxışında qeyd edib ki, Yeni Azərbaycan Partiyasının qurucusu, ulu öndər Heydər Əliyev 1993-cü ilin iyununda son dərəcə mürəkkəb, ağır bir dövrdə xalqın təkidli tələbi ilə ölkəyə rəhbərlik məsuliyyətini üzərinə götürməsəydi, bugünkü müstəqil, qüdrətli, sürətlə inkişaf edən, regionun lider dövlətinə çevrilən Azərbaycandan danışmaq mümkün olmazdı.
Diqqətə çatdırılıb ki, olduqca çətin bir şəraitdə yaranmış partiyanın çox qısa müddətdə əsl siyasi qüvvə kimi formalaşması, minlərlə əqidəli insanın onun sıralarında birləşməsi bu gün bir daha Heydər Əliyev fenomeninin, dühasının qüdrətindən xəbər verir.
Deputat Sahibə Qafarova bildirib ki, məhz ulu öndər Heydər Əliyevin müdrikliyi, uzaqgörənliyi, zəngin dövlətçilik təcrübəsi nəticəsində Azərbaycan dövlətçiliyi məhvolma təhlükəsindən xilas olub. Ulu Öndərin titanik fəaliyyəti nəticəsində ölkə daxilində ayrı-ayrı siyasi qüvvələrə tabe olan hərbi birləşmələr ləğv edilib, vətəndaş müharibəsi və separatçılığın qarşısı alınıb. Bu gün müstəqil Azərbaycan Respublikası, möhkəm özülə söykənən dövlətçiliyimiz Prezident İlham Əliyevin rəhbərliyi ilə uğurlu gələcəyə doğru addımlayır.
Digər çıxış edənlər partiyanın cəmiyyətin inkişafına yönəlmiş çoxsaylı sosial layihələri reallaşdırmasının, gəncləri dövlətçilik və milli maraqlar ətrafında sıx birləşdirməsinin onun tərəfdarlarının sayının artmasına səbəb olduğunu vurğulayıblar.
Tədbirin sonunda rayonun ictimai-siyasi həyatında fərqlənənlərə YAP rayon təşkilatı tərəfindən fəxri fərmanlar və hədiyyələr təqdim edilib.