ELM VƏ TƏHSİL


Şəmkirdə mühazirə: “Cümhuriyyət tariximiz və müasirlik”

Bakı, 20 fevral, AZƏRTAC

Fevralın 20-də Şəmkir şəhərindəki Heydər Əliyev Mərkəzində Azərbaycan Xalq Cümhuriyyətinin 100 illiyi ilə bağlı tədbir təşkil olunub.

Azərbaycan Respublikasının Prezidenti yanında Bilik Fondunun və Şəmkir Rayon İcra Hakimiyyətinin birgə təşkilatçılığı ilə keçirilən tədbir çərçivəsində Milli Məclisin deputatı Aydın Mirzəzadə rayon ictimaiyyəti ilə görüşüb.

Bilik Fondundan AZƏRTAC-a bildirilib ki, Prezident İlham Əliyevin 2018-ci ilin ölkəmizdə “Azərbaycan Xalq Cümhuriyyəti İli” elan edilməsi haqqında imzaladığı Sərəncama uyğun təşkil olunan tədbirdə əvvəlcə iştirakçılar Şəmkir Rayon İcra Hakimiyyətinin başçısı Alimpaşa Məmmədovla görüşüb, rayonda həyata keçirilən quruculuq işləri, davamlı islahatlarla bağlı fikir mübadiləsi aparıblar.

Tədbirdə Şəmkir şəhərindəki Heydər Əliyev Mərkəzinin direktoru və Bilik Evinin müdiri, Milli Məclisin deputatı Sona Əliyeva Bilik Fondunun dəstəyi ilə Bilik Evinin təşkil etdiyi müxtəlif məzmunlu maarifləndirici layihələrdən danışıb.

Bilik Fondunun mətbuat katibi Ceyhun Musaoğlu təmsil etdiyi qurumun “Azərbaycan Xalq Cümhuriyyəti İli” çərçivəsində elm-təhsil müəssisələrində, dövlət və özəl qurumlarda təşkil etdiyi və planlaşdırdığı tədbirlər barədə ətraflı məlumat verib. O, 2018-ci ildə Azərbaycanın ev sahibliyi edəcəyi regional və beynəlxalq səviyyəli mötəbər tədbirləri xatırladıb, ölkəmizin dünya dövlətləri arasında etibar qazandığını diqqətə çatdırıb.

Yeni Azərbaycan Partiyası Şəmkir rayon təşkilatının sədri Fəxrəddin Vəliyev hakim partiyanın xalqdan yekdilliklə dəstək alaraq, ulu öndər Heydər Əliyevin rəhbərliyi ilə demokratik hüquqi prinsiplərə və milli-mənəvi dəyərlərə söykənərək, Azərbaycan Xalq Cümhuriyyətinin mənəvi varisliyi prizmasından ölkəmizin ikinci dəfə müstəqilliyinə nail olduğunu xatırladıb.

Sonra A.Mirzəzadənin “Cümhuriyyət tariximiz və müasirlik” mövzusunda mühazirəsi dinlənilib. Azərbaycan xalqının zəngin dövlətçilik tarixindən danışan Milli Məclisin deputatı deyib: “Genetik yaddaş hər nəslə azərbaycançılığı qoruyub saxlamağa və yeni dəyərlərlə genişləndirməyə imkan verir. 1918-1920-ci illərdə fəaliyyət göstərmiş Azərbaycan Xalq Cümhuriyyəti xalqımızın müstəqillik potensialının göstəricisi idi. Tarixi səbəblərdən süquta uğrayan respublika 1991-ci ildə yenidən tarix səhnəsinə qayıtdı, 1993-cü ildən isə əvvəl ümummilli lider Heydər Əliyevin, sonra isə Prezident İlham Əliyevin uğurlu fəaliyyəti sayəsində müstəqilliyimiz əbədi oldu”.

Sonda A.Mirzəzadə tədbir iştirakçılarının suallarını cavablandırıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.