Belqrad, 30 may, AZƏRTAC

Serbiya və Kosovo arasında gərginlik davam edir.

AZƏRTAC xəbər verir ki, Kosovonun şimalında yerləşən Zveçan bölgəsində yaşayan serblərlə NATO-nun Kosovodakı missiyasının (KFOR) hərbçiləri arasında qarşıdurma baş verib. Zveçan bələdiyyəsinin qarşısına toplaşan serb nümayişçiləri dağıtmağa çalışan KFOR-un üzvləri gözyaşardıcı qazdan və səs bombalarından istifadə ediblər. Toqquşmalar nəticəsində 10-dan çox KFOR sülhməramlısı yaralanıb.

KFOR yaydığı bəyanatda tərəfləri gərginliyi artıran hərəkətlərdən çəkinməyə çağırıb, vəziyyətlə bağlı Kosovo və Serbiya hərbi nümayəndələri, həmçinin Avropa İttifaqının Qanunun Aliliyi Missiyası (EULEX) ilə müzakirələrin aparıldığı bildirilib.

Serbiya Prezidenti Aleksandar Vuçiç ordunun hazır vəziyyətdə olduğunu və lazımi mövqelərə yerləşdirildiyini bildirib, Kosovo serblərini NATO ilə qarşıdurmaya girməməyə çağırıb.

Baş nazir Ana Brnabiç isə vəziyyətin çox gərgin olduğunu və heç vaxt budəfəki kimi çətin olmadığını deyib. Qeyd edib ki, ölkəsinin əsas vəzifəsi Kosovoda sülhü və serbləri qorumaqdır.

Müdafiə naziri Miloş Vuçeviç ordunun ölkənin Kosovo ilə sərhədinə yerləşdirildiyini açıqlayıb. Bildirib ki, Serbiya ordusu baş komandan Aleksandar Vuçiçin hər bir əmrini yerinə yetirməyə hazırdır.

Xatırladaq ki, Kosovonun şimalında yaşayan serblərlə Kosovo təhlükəsizlik qüvvələri arasında mayın 26-da da qarşıdurma olub. Nəticədə 5 polis əməkdaşı yüngül xəsarət alıb, 4 xidməti avtomobilə ziyan dəyib.

Nihad Budaqov

AZƏRTAC-ın xüsusi müxbiri

Belqrad