Bakı, 13 yanvar, AZƏRTAC

Dövlət Sərhəd Xidməti (DSX) tərəfindən 2016-cı ilin dekabr ayı ərzində dövlət sərhədinin etibarlı mühafizəsi istiqamətində məqsədyönlü tədbirlər həyata keçirilib, qaçaqmalçılığa, qеyri-lеqal miqrasiyaya, narkotik vasitələrin qeyri-qanuni dövriyyəsinə qarşı mübarizə uğurla davam etdirilib.

Dövlət Sərhəd Xidmətinin mətbuat mərkəzindən AZƏRTAC-a bildiriblər ki, ay ərzində dövlət sərhədini pozduqlarına görə 38 halda 58 nəfər saxlanılıb. Onların 23-ü Azərbaycan, 7-si Qana, 6-sı Özbəkistan, 6-sı Nigeriya, 5-i İran, 3-ü Banqladeş, 2-si Ukrayna, hər ölkədən bir nəfər olmaqla Qazaxıstan, Rusiya, Türkiyə, Tacikistan, Kamerun, Qırğızıstan vətəndaşı olub.

Sərhəd rejim qaydalarını pozarkən yaşıl sərhəddə 10 halda 19 nəfər, Xəzər dənizində 8 halda 13 nəfər, sərhəd nəzarəti məntəqələrində 487 halda 659 nəfər saxlanılaraq barələrində müvafiq tədbirlər görülüb.

Cinayətkarlığa qarşı mübarizə tədbirləri nəticəsində Azərbaycan Respublikasının hüquq-mühafizə orqanları tərəfindən axtarışda olan 373 nəfər aşkarlanaraq aidiyyəti orqanlara təhvil verilib.

Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 14 halda 12 kiloqram 460,4 qram narkotik maddə aşkar edilərək götürülüb.

Cəlilabad rayonunun Dələli kənd ərazisindəki sərhəd zastavasının xidməti sahəsində qabaqlayıcı əməliyyat məlumatları əsasında həyata keçirilən tədbirlər nəticəsində ötən il dekabrın 11-də və 21-də narkotik maddələr olan 3 kiloqram 785 qram heroinin, 4 kiloqram 200 qram kokosun, 3 kiloqram 600 qram tiryəkin və 580 qram metadonun dövlət sərhədindən ölkəmizə gətirilməsinin qarşısı alınıb.

Qaçaqmalçılıq fəaliyyətinə qarşı mübarizə çərçivəsində həyata keçirilmiş tədbirlər nəticəsində 73 halda ümumi dəyəri təqribən 919 min 390 manat olan qaçaqmal, о cümlədən 7 tüfəng, 42 patron, 10 radiostansiya, 14655 qutu pirotexniki vasitə, 10000 Azərbaycan manatı, 120000 ABŞ dolları, 6027 qutu müxtəlif markalı siqaret, 31 mobil tеlеfоn, 1 qayıq, 10670 tibbi ləvazimatlar, 603 müxtəlif növ dərman preparatları və müxtəlif sənaye malları saxlanılıb.

Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.