SİYASƏT
Sevinc Fətəliyeva: Azərbaycanın Qoşulmama Hərəkatına sədr seçilməsi dünyada ona olan hörmətin və inamın göstəricisidir
Bakı, 28 oktyabr, AZƏRTAC
Bakıda Qoşulmama Hərəkatına üzv ölkələrin dövlət və hökumət başçılarının Zirvə Görüşünün keçirilməsi, şübhəsiz ki, təkcə bizim ölkənin deyil, bütün dünya ictimaiyyətinin siyasi həyatında ən vacib hadisədir. Bu da təsadüfi deyil. Hazırda 120 ölkənin üzv olduğu və özündə heç bir hərbi və siyasi bloklarda iştirak etməyən, öz prioritetləri və gündəlikləri olan ölkələri birləşdirən Qoşulmama Hərəkatı BMT-dən sonra ən böyük siyasi təsisatdır.
Bu fikirləri AZƏRTAC-a Milli Məclisin Beynəlxalq münasibətlər və parlamentlərarası əlaqələr komitəsinin sədr müavini, YAP-ın Beynəlxalq əlaqələr şöbəsinin müdiri Sevinc Fətəliyeva deyib.
S.Fətəliyeva bildirib ki, dünya əhalisinin 55 faizdən çoxu bu hərəkata üzv olan ölkələrin vətəndaşlarıdır. Miqyas son dərəcə cəlbedicidir. Bu səbəbdən, Azərbaycanın bu cür nüfuzlu bir təsisatın sədri seçilməsi ikiqat qürurverici və məsuliyyətlidir. Yerli və xarici müşahidəçilərin çoxunun ümumi fikrinə görə, Azərbaycanın 3 il müddətinə bu təşkilata sədr seçilməsi, şübhəsiz ki, diplomatiyamızın növbəti qələbəsidir: “Qoşulmama Hərəkatına 3 il müddətinə sədrlik bizə nə verir? Qoşulmama Hərəkatı bizim üçün mövcud beynəlxalq əlaqələrimizin möhkəmləndirilməsi, habelə yeni ikitərəfli münasibətlərin qurulması və təbii ki, ilk növbədə, Ermənistan-Azərbaycan Dağlıq Qarabağ münaqişəsinin reallıqlarının dünya ictimaiyyətinə çatdırılması baxımından bir növ siyasi arenadır. Qoşulmama Hərəkatının əsaslandığı, dövlətlərin ərazi bütövlüyünə və suverenliyinə hörməti, bir-birinin daxili işlərinə qarışmamağı ehtiva edən Bandunq prinsipləri Azərbaycanın xarici siyasət prinsipləri ilə üst-üstə düşür. Təsadüfi deyil ki, Prezident İlham Əliyev böhran, münaqişə və beynəlxalq siyasətin digər problemli mövzularının böyük əksəriyyətinin həllinin qarantı olan beynəlxalq hüququn norma və müddəalarına riayət edilməsinin vacibliyini xüsusi vurğulayıb. Dövlət başçısı açıq şəkildə bildirib ki, münaqişələrin böyük əksəriyyətinin səbəbi dünya siyasətindəki ikili standartlardır”.
Deputat deyib ki, Türkiyənin qonşu Suriyada həyata keçirdiyi müvəqqəti və məcburi antiterror əməliyyatları dərhal diqqəti özünə cəlb etdiyi halda, niyə Ermənistanın Azərbaycana qarşı 25 ildən artıqdır davam edən təcavüzü dünyanın qabaqcıl ölkələri tərəfindən diqqətsiz qalır? Türkiyə Ermənistandan fərqli olaraq, dəfələrlə Suriyanın ərazi bütövlüyünə sadiqliyini təsdiq etdiyi halda, Ermənistan həm sözdə, həm də əməli olaraq ölkəmizə qarşı bu prinsipləri pozur.
S.Fətəliyeva qeyd edib ki, dünyada etnik və dini zəmində münaqişələrin artdığı bir zamanda Azərbaycanın multikulturalizm siyasətinin uğurla həyata keçirilməsindəki unikal təcrübəsi, həmçinin insan kapitalının qorunub saxlanması, bir milyondan çox qaçqın və məcburi köçkünün yaşayış, təhsil, tibb xidmətləri ilə təmin edilməsi nadir təcrübə hesab olunur ki, Azərbaycan bu təcrübəsini dünya ictimaiyyəti ilə bölüşməyə hazırdır. Qeyd etmək lazımdır ki, Prezident İlham Əliyev nitqində Azərbaycanın xarici siyasətinin prioritetlərini təfərrüatlı şəkildə izah etdi, Azərbaycanın sədrliyi dövründə Qoşulmama Hərəkatının fəaliyyət perspektivlərinə, ölkəmizdə baş verən hadisələrə ətraflı yer ayırdı, həmçinin Ermənistan-Azərbaycan Dağlıq Qarabağ münaqişəsi ətrafındakı vəziyyətlə bağlı təfsilatı ilə danışdı. Prezident İlham Əliyevin BMT-də beynəlxalq hüququn norma və prinsiplərinin təmin edilməsi və onlara riayət olunması ilə bağlı səylərin göstərilməsi, sərhədlərin güc yolu ilə dəyişdirilməsinin qarşısının alınması, ölkələrin ərazi bütövlüyünün pozulmasına yönəlik islahatların keçirilməsinə dair çağırışı da beynəlxalq siyasətdə ikili standartlara qarşı mübarizənin zəruriliyindən qaynaqlanıb. Bakıda keçirilən XVIII Zirvə Görüşü Ermənistan-Azərbaycan Dağlıq Qarabağ münaqişəsi ilə bağlı Azərbaycanın ədalətli mövqeyini daha da gücləndirdi. Qəbul edilmiş sənədlərdə dövlət və hökumət başçıları münaqişənin BMT Təhlükəsizlik Şurasının qətnamələrinə baxmayaraq, hələ də həll olunmamasından təəssüf hissi keçirdiklərini bildirir və onun Azərbaycanın suverenliyi, ərazi bütövlüyü, sərhədlərinin toxunulmazlığı əsasında həll olunmasının vacibliyini vurğulayırlar.
Yekun Sənədə ilk dəfə olaraq çox mühüm yeni bənd daxil edildi. Bu bənddə dövlət və hökumət başçıları güc yolu ilə ərazilərin zəbt edilməsinin yolverilməzliyini vurğulayır və təsdiq edirlər ki, heç bir dövlət Azərbaycan Respublikasının ərazilərinin işğal edilməsi nəticəsində yaranmış vəziyyətin qanuniliyini tanımayacaq, bu ərazilərdə iqtisadi fəaliyyətlər də daxil olmaqla, bu cür vəziyyətin saxlanması üçün hər hansı kömək göstərməyəcək. Burada bilavasitə işğalçı ifadəsindən istifadə olunur. Bu, Ermənistanın növbəti dəfə 120 dünya dövləti tərəfindən işğalçı kimi tanınması deməkdir.
Azərbaycanın bu təşkilatda iştirakı bir növ nümayiş etdirir ki, bizim üçün hər hansı hərbi bloklara üzvlük heç bir maraq kəsb etmir. Azərbaycanın xarici siyasətinin əsas məqsədi bərabərhüquqluluq, qarşılıqlı fayda kəsb edən əməkdaşlıq, qarşılıqlı maraq və dəstəyə əsaslanan ikitərəfli və çoxtərəfli münasibətlərin möhkəmləndirilməsidir. Münaqişə qurbanı olan Azərbaycan Prezident İlham Əliyevin yürütdüyü uğurlu iqtisadi siyasət sayəsində qısa müddət ərzində yardım alan ölkədən həm humanitar, həm də iqtisadi yardım edən ölkəyə çevrilib. Prezident İlham Əliyev 2005-ci ildən etibarən Azərbaycanın 90-dan çox ölkəyə humanitar və texniki yardım göstərdiyini Zirvə Görüşü iştirakçılarının diqqətinə çatdırdı. Bu da bir daha Azərbaycanın hazırda qlobal beynəlxalq gündəlikdə hansı rola malik olmasının göstəricisidir. Burada qeyd etmək lazımdır ki, Zirvə Görüşünün keçirilməsi Azərbaycanın İqtisadi Əməkdaşlıq və İnkişaf Təşkilatının İnkişafa Yardım Komitəsinə iştirakçı statusu almasından qısa müddət sonraya təsadüf edib. Azərbaycan yeganə MDB ölkəsidir ki, dünyanın qabaqcıl iqtisadiyyatlarına malik ölkələrinin arasında bu statusa malikdir. Şübhə yoxdur ki, Qoşulmama Hərəkatına sədrliyi dövründə inkişaf etməkdə olan ölkələrə humanitar və elmi-texniki dəstək göstərilməsi ölkəmiz tərəfindən ikiqat səylə davam etdiriləcək. Azərbaycan yardıma ehtiyac duyan ölkə və xalqların köməyinə çatmağa hazır olduğunu təkcə sözdə deyil, əməli olaraq da nümayiş etdirir. Bu da bir daha sübut edir ki, ölkəmiz üçün sözlərlə əməllər hər zaman üst-üstə düşür.
S.Fətəliyeva söyləyib ki, hazırda Azərbaycan bir növ Şərqlə Qərb arasında körpü rolunu oynayır: “Azərbaycanın bu yaxınlarda ölkəmizdə Zirvə Görüşünün yüksək səviyyədə keçirildiyi Türkdilli Dövlətlərin Əməkdaşlıq Şurasındakı möhkəm mövqeləri, həmçinin Azərbaycanın İslam Əməkdaşlıq Təşkilatı, Avropa Şurası, ATƏT və digər beynəlxalq təşkilatlardakı mövqeyi, şübhəsiz ki, Qoşulmama Hərəkatına üzv ölkələr arasında əməkdaşlığın möhkəmləndirilməsi və inkişaf etdirilməsində böyük rol oynayacaq, habelə Azərbaycanın iqtisadi münasibətlərinin inkişafına yardım edəcək. Azərbaycan bir daha sübut edir ki, bu cür fərqli ölkələri bir arenada birləşdirmək, planetimizdə sülh və təhlükəsizlik naminə onlar arasında dialoqu təmin etmək iqtidarındadır. Ölkəmizin Qoşulmama Hərəkatına sədr seçilməsi Bakının bu rolunun getdikcə dünyada daha çox qəbul edilib dəstəklənməsinin parlaq təzahürüdür. Sədrliyin Azərbaycana həvalə olunması ölkəmizə dünya miqyasında göstərilən hörmətin, inamın və etimadın göstəricisidir”.