İQTİSADİYYAT


Sığortaçıların dekabr ayı üçün reytinq cədvəli açıqlanıb

Bakı, 9 yanvar, AZƏRTAC

Azərbaycan Sığortaçılar Assosiasiyası İctimai Birliyi (Birlik) sığorta şirkətlərinin xidmət səviyyəsi və müştərilərə qarşı yanaşması üzrə formalaşmış reytinqinin dekabr ayı üçün olan nəticələrini açıqlayıb.

ASA-nın mətbuat xidmətindən AZƏRTAC-a bildiriblər ki, 2018-ci ilin və dekabr ayının yekunlarına əsasən birliyin rəsmi saytında (www.asa.az) indiyədək vətəndaşlar tərəfindən sığorta şirkətləri barədə 222 rəy bildirilib. Bu rəylərdən 111-i “təsdiqlənmiş”, 12-si isə “həll edilmiş” kateqoriyasına daxil olub.

Reytinq cədvəli aşağıdakı kimi formalaşıb:

Dekabr ayının nəticələrinə görə “A-Group Sığorta” şirkəti 31 balla müştəri məmnuniyyətinin təmin olunması baxımından yenidən reytinq cədvəlinin ən yüksək pilləsində qərarlaşıb. Şirkət barədə saytda ümumi 23 müsbət rəy qeyd olunub ki, bu rəylərin hər biri birlik tərəfindən araşdırılıb və həqiqiliyi öz təsdiqini tapıb.

Reytinq cədvəlinin ikinci pilləsi “Atəşgah Sığorta” şirkətinə məxsusdur. Şirkət ümumi 38 rəy əsasında 30 bal toplayıb. Barəsində qeyd olunmuş 3 rəylə 6 bal toplayan “Qala Həyat Sığorta” şirkəti cədvəldə 3-cü pillədə mövqe tutub. 4 və 5-ci yerləri hər biri 1 balla “Xalq Sığorta” və “PAŞA Sığorta” şirkətləri bölüşüb.

Xidmət səviyyəsi -3 və -8 intervalında qiymətləndirilərək cədvəlin 18-22-ci yerlərini formalaşdıran şirkətlərin siyahısına daxildir: “AzSığorta” – -3 bal, “Günay Sığorta” – -4 bal, “Meqa Sığorta” – -5 bal, “AtaSığorta” – -7 bal və “AzərSığorta” – -8 bal.

Azərbaycan Sığortaçılar Assosiasiyası İctimai Birliyi sığorta şirkətlərinin xidmət və müştəri məmnuniyyəti səviyyəsi və sığortaçıların reytinq cədvəlinin müəyyən edilməsi üçün müştəriləri bundan sonra da sığorta şirkətlərinin xidmət və fəaliyyətini dəyərləndirmək sahəsində aktiv olmağa dəvət edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.