Bakı, 25 iyun, AZƏRTAC

İyunun 26-sı təqvimimizin şanlı səhifələrindən biri, Azərbaycan Silahlı Qüvvələrinin yarandığı gündür. Yüz üç il əvvəl bu gün Azərbaycan Xalq Cümhuriyyətinin Nazirlər Şurası ilk milli ordu birləşməsinin təşkili barədə qərar qəbul edib. Cümhuriyyət dövrünün əksər səhifələri kimi, bu tarixdən də uzun müddət xəbərsiz olmuşuq. Yalnız 1998-ci ildə bu gün təqvimdə layiq olduğu yeri alıb. Ulu öndər Heydər Əliyevin 1998-ci il 22 may tarixli Fərmanı ilə 26 iyun Azərbaycan Silahlı Qüvvələri Günü elan edilib. Milli Ordunun yaranması isə yeni qurulan dövlətin özünütəsdiq tarixinin ən önəmli mərhələsi idi. Dövlət müstəqilliyimizin bərpasından sonra ilk dəfədir ki, bu il ordumuz tarixə qızıl hərflərlə yazılan Qələbəyə gedən azadlıq hərəkatının sonu kimi Silahlı Qüvvələr Gününü qalib kimi qeyd edir. Yüz üç yaşı olan Azərbaycan Ordusunun Zəfər yolu Qarabağdan keçdi.

Bunu AZƏRTAC-a açıqlamasında Milli Məclisin deputatı Anar Məmmədov deyib.

Deputat diqqətə çatdırıb ki, müasir dövrdə Ulu Öndərin irsi Prezident, Silahlı Qüvvələrin Ali Baş Komandanı İlham Əliyev tərəfindən uğurla davam etdirilir. Müstəqil dövlətçilik kursunu inkişaf etdirən ölkə başçısı həm suverenliyimizin, həm də ərazi bütövlüyümüzün qarantı olan Azərbaycan Ordusunun hərbi qüdrətinin artırılmasına daim diqqət yetirir. Azərbaycan Silahlı Qüvvələri müasir hərbi texnika ilə təchiz edilib, Vətənin müdafiəsinə daim hazır olan yüksək nizam-intizama malik quruma çevrilib. Prezident İlham Əliyevin bəyan etdiyi kimi, Ordunun gücləndirilməsi daim prioritet məsələdir. Ümumiyyətlə, son illər bütün sahələrdə olduğu kimi, ordu quruculuğunda da möhtəşəm uğurlar qazanılıb. Müzəffər Ali Baş Komandan İlham Əliyevin həyata keçirdiyi qətiyyətli, düşünülmüş siyasəti nəticəsində bu gün Azərbaycan Cənubi Qafqazın ən güclü iqtisadiyyatına və modern ordusuna sahibdir.

“Bu gün dünya reytinqində də ən güclü ordular sırasında olan Silahlı Qüvvələrimizin arsenalında dünya hərb sənayesinin ən son yenilikləri olan silah-sursat yer alır. Dövlətimizin başçısı tez-tez təmas xəttində olur, əsgərlərlə görüşür, onları təltif edir, qayğıları ilə maraqlanır. Bunlar həm orduda böyük ruh yüksəkliyi yaradır, həm də onun daxilindəki problemlərin öyrənilib həll edilməsinə imkan verir. Bütövlükdə ordu-rəhbər birliyi, ordu-xalq vəhdəti ölkəmizdə ən yüksək səviyyəyə çatıb”, - deyən deputat vurğulayıb ki, Prezident İlham Əliyevin iyunun 24-də - Silahlı Qüvvələr Günü ərəfəsində 76 mindən çox hərbçini təltif etməsi qalib Orduya olan diqqət və qayğının nəticəsidir. Azərbaycan Prezidentinin hərbi qulluqçuların təltif edilməsi barədə imzaladığı sərəncamlar Silahlı Qüvvələrin şəxsi heyətini daha qətiyyətli, Vətənin müdafiəsi işində daha əzmkar və ayıq-sayıq olmağa ruhlandırır. Azərbaycan Ordusu Ermənistana uzun illər rəhbərlik etmiş cinayətkarlara dərs verərək, Köçəryan-Sarkisyan ordusunu məhv etdi. Şuşanın işğaldan azad edilməsi Azərbaycan xalqının gücünü, ordunun peşəkarlığını, hərbçilərin cəsarətini və qəhrəmanlığını göstərdi. Babaların yüz üç il əvvəl Gəncədən Bakıya istiqlalı gətirən zəfər yolu nəvələrin sayəsində Qarabağdan da keçdi.

“Beləliklə, 44 günlük Vətən müharibəsi dünya ictimaiyyətinə Azərbaycan Ordusunun nə qədər qüdrətli ordu olduğunu bir daha nümayiş etdirdi. Bütün dünya şahidi oldu ki, Azərbaycan Ordusu bu döyüşlərdə necə peşəkarlıq, qəhrəmanlıq, məharət göstərdi. Bununla da öz ordusu haqqında yalanlar, miflər uyduran Ermənistanın yalan dolu təbliğatına ciddi zərbə vuruldu”, -deyə Anar Məmmədov fikirlərini yekunlaşdırıb.