REGİONLAR
Şimal-qərb bölgəsinin qabaqcıl kənd təsərrüfatı işçiləri mükafatlandırılıblar
Qəbələ-Balakən, 1 noyabr, Mustafa Dadaşov, AZƏRTAC
Cari ilin 9 ayı ərzində Qəbələ rayonunda aqrar sahədə məhsul istehsalı ötən ilin müvafiq dövrü ilə müqayisədə 1 milyon 116 min manat və ya 2,1 faiz artıb. Builki mövsümdə qəbələli fermerlər 20 min 100 hektar taxıl sahəsindən 64 min 464 ton məhsul götürüblər. Cari ildə rayonda 101 kümçü tərəfindən 9 min 110 kiloqram barama istehsal edilib. Tütünçülər 75 hektar sahədə tütün yetişdiriblər. İndiyədək sahələrdən 432 ton yaşıl tütün kütləsi yığılıb. Bu il fındıq bağlarından 7 min 150 ton məhsul tədarük olunub.
AZƏRTAC-ın bölgə müxbiri xəbər verir ki, bu barədə Kənd Təsərrüfatı İşçiləri Günü münasibətilə noyabrın 1-də Qəbələ Dövlət Aqrar İnkişaf Mərkəzində keçirilən tədbirdə məlumat verilib.
Rayonun kənd təsərrüfatı işçiləri əvvəlcə ümummilli lider Heydər Əliyevin Qəbələ şəhərinin mərkəzində ucaldılan abidəsi önünə gül dəstələri düzərək xatirəsinə ehtiramlarını bildiriblər.
Tədbirdə Mərkəzin direktoru Rahib Əhmədov və rayon icra hakimiyyəti başçısının müavini Arif Allahverdiyev çıxış edərək, kənd təsərrüfatı işçilərini əlamətdar gün münasibətilə təbrik edib, aqrar sahənin inkişafına göstərilən yüksək dövlət qayğısından danışıblar. Diqqətə çatdırılıb ki, Azərbaycan Prezidentinin 2008-ci il 9 oktyabr tarixli Sərəncamı ilə hər il 1 noyabr ölkəmizdə Kənd Təsərrüfatı İşçiləri Günü kimi qeyd olunur.
Bildirilib ki, Prezident İlham Əliyevin tapşırığına əsasən, son illər aqrar sektorda strateji məhsulların, o cümlədən Qəbələ rayonu üçün xarakterik olan baramaçılığın, tütünçülüyün, fındıqçılığın və digər gəlir gətirən ixracyönümlü sahələrin inkişafına diqqət artırılıb. Görülən işlər nəticəsində bu ilin ötən dövrü ərzində rayonda istər bitkiçilik, istərsə də heyvandarlıq məhsulları istehsalında dinamik artım qeydə alınıb.
Tədbirin sonunda bir qrup qabaqcıl kənd təsərrüfatı işçisinə fəxri fərmanlar təqdim olunub.
X X X
Balakən rayonunun kənd təsərrüfatı işçiləri də peşə bayramlarını yüksək əhvali-ruhiyyə ilə qeyd ediblər. Bu da təsadüfi deyildir. Belə ki, cari ilin 9 ayında rayonda aqrar sahədə məhsul istehsalı ötən ilin müvafiq dövrü ilə müqayisədə 13 faiz artaraq 61,7 milyon manat olub. Builki mövsümdə balakənli kümçülər 29,8 ton yaş barama istehsal edərək “Azəripək” MMC-yə təhvil veriblər. Proqnoz tapşırığa 130,3 faiz əməl olunub. Fındıqçılığın daha da inkişaf etdirilməsi məqsədi ilə bu ilin yaz aylarında rayon ərazisində 700 hektar sahədə yeni fındıq bağları salınaraq, bağların ümumi sahəsi 9 min 634 hektara çatdırılıb. Cari mövsümdə fındıq bağlarından 6 min 204 ton məhsul tədarük olunub. Fındıq istehsalı ötən ilin müvafiq dövrü ilə müqayisədə 819 ton və ya 15,2 faiz artıb.
AZƏRTAC-ın bölgə müxbiri xəbər verir ki, əlamətdar gün münasibətilə rayonun kənd təsərrüfatı işçiləri ümummilli lider Heydər Əliyevin adını daşıyan mədəniyyət və istirahət parkına gələrək, dahi rəhbərin dağüstü yüksəklikdə ucaldılmış abidəsi önünə gül dəstələri düzüb, xatirəsini ehtiramla yad ediblər.
Toplantıda rayon icra hakimiyyətinin başçısı İslam Rzayev çıxış edərək, aqrar sahədə qazanılan uğurlar barədə danışıb.
Tədbirin sonunda bir qrup qabaqcıl kənd təsərrüfatı işçisinə fəxri fərmanlar təqdim edilib.