Xaçmaz, 10 mart, Elxan Yusifli, AZƏRTAC

“Ərzaq məhsullarının tədarükü və təchizatı” ASC təchizat səviyyəsini öyrənmək, yerli məhsulların tədarük potensialını yaratmaq, istehsalçılarla yaxın münasibət qurmaq məqsədi ilə həyata keçirdiyi növbəti maarifləndirici görüşə şimal rayonlarındakı (Xaçmaz, Quba, Qusar, Şabran, Siyəzən) dövlət satınalan təşkilatları və yerli icra nümayəndələri cəlb olunub.

AZƏRTAC xəbər verir ki, martın 10-da Xaçmaz şəhərindəki Heydər Əliyev Mərkəzində təşkil olunan görüşdə “Ərzaq məhsullarının tədarükü və təchizatı” ASC İdarə heyətinin sədr müavini Elşən Əsədov çıxış edərək son illər dövlətimizin başçısının rəhbərliyi ilə qeyri-neft sektorunun inkişafı istiqamətində həyata keçirilən tədbirlərdən söz açıb. Bildirilib ki, Azərbaycan Respublikası Prezidenti İlham Əliyev tərəfindən “Ərzaq məhsullarının tədarükü və təchizatı” ASC-nin yaradılması aqrar sektorda tədarük zəncirinin formalaşdırılmasına, fermerlərin istehsal etdikləri məhsulların tədarük olunmasına, eləcə də satınalan müəssisələrin təchizat səviyyəsinin yüksəldilməsinə səbəb olacaq. Cəmiyyət dövlətimizin başçısının tapşırıqları istiqamətində tədarük-təchizat səviyyəsinin yüksəldilməsi üçün regional görüşlər, sorğular, monitorinqlər keçirir.

Diqqətə çatdırılıb ki, hazırda Xaçmaz Regional Bölməsi üzrə 60 körpələr evi-uşaq bağçası, 12 mərkəzi xəstəxana, bir hərbi hissə satınalan təşkilatı keyfiyyətli ərzaq məhsulları ilə təmin edilir.

Qeyd edilib ki, “Ərzaq məhsullarının tədarükü və təchizatı” ASC fəaliyyətə başlamasından qısa vaxt keçməsinə baxmayaraq, cəmiyyətin 12 regionda struktur bölməsi, 46 rayonda dayaq məntəqəsi yaradılıb. Mərkəzi Bakıda olmaqla, 12 rayonda xüsusi təyinatlı, müasir standartlara cavab verən soyuducu tipli depo-anbarlar qurularaq istifadəyə verilib. Həmin anbarlarda ölkədə istehsal olunan bütün növ ərzaq məhsullarının standartlara uyğun uzunmüddətli, keyfiyyətli saxlanma şəraiti təmin edilib. Ötən müddətdə dövlət büdcəsindən maliyyələşən satınalan təşkilatlarla 825 müqavilə bağlanılıb. Mərkəzi və yerli icra hakimiyyəti orqanlarının ərzaq tələbatının təmin edilməsi üçün 1859 təchizat nöqtəsinin ərzaq təminatı tam təmin edilib. Cəmiyyət cari il yanvarın 1-dən satınalan təşkilatların - təhsil müəssisələri, körpələr evi-uşaq bağçaları, xəstəxanalar, hərbi hissələr, eləcə də digər dövlət obyektlərinin təchizatının həyata keçirilməsinə başlayıb.

Bütün bölgələrdə keçirilən bu görüşlərin məqsədi regionlarda istehsal-tədarük potensialının aşkara çıxarılması, bölgədə istehsal olunan məhsulların dövlət satınalan təşkilatlarının ərzaq ehtiyacına yönəldilməsidir. Hər bir bölgədə yerləşən, təhsil müəssisəsi, körpələr evi-uşaq bağçaları, xəstəxanalar, eləcədə hərbi hissələrin ərzaq təminatı həmin bölgənin istehsal imkanları hesabına təmin olunarsa, rayonlara böyük həcmdə vəsaitlər daxil olacaq. Əsas məqsəd büdcə vəsaitlərinə qənaət, şəffaflığın təmin olunması, yerli istehsalın dəstəklənməsidir.

Regional görüşdə satınalan təşkilatların ərzaq məhsullarına tələbatı elektron portalından (tedaruk.az) istifadə qaydaları, qeydiyyatdan keçmə prosedurları ilə bağlı təlimatlar izah olunub. Tövsiyə edilib ki, hər bir satınalan təşkilat portalda öz tələbatını düzgün yerləşdirməli, dövlət vəsaitlərindən düzgün istifadə edilməsi məqsədi ilə verilən tələbatlar real ehtiyaclara uyğun olmalıdır.

Görüşdə uşaq bağça müdirlərinin, xəstəxana nümayəndələrinin bu istiqamətdə çoxsaylı sualları cavablandırılıb, portalla işləmək bacarıqları ətraflı şərh olunub.

Regional müşavirənin sonunda satınalan təşkilat nümayəndələri tədarük-təchizat səviyyəsinin yüksəldilməsi, yerli məhsulların tədarük imkanları haqqında təkliflər səsləndiriblər.