CƏMİYYƏT
“Sintetik torlarla və qadağan olunmuş alətlərlə balıq ovuna yox deyirik!” devizi altında aksiyalara başlanılıb VİDEO
Bakı, 19 oktyabr, AZƏRTAC
“Sintetik torlarla və qadağan olunmuş alətlərlə balıq ovuna yox deyirik!” devizi altında aksiyalara başlanılıb.
AZƏRTAC xəbər verir ki, oktyabrın 19-da Xəzər dənizin Zirə sahilinin bir hissəsi qadağan olunmuş balıq ovlama alətlərindən, o cümlədən sintetik torlardan təmizlənib. “Sintetik torlarla və qadağan olunmuş ov alətləri ilə balıq ovuna yox deyirik!” devizi altında keçirilən aksiyada Ekologiya və Təbii Sərvətlər Nazirliyinin rəsmiləri, Həvəskar Balıqçılar İttifaqının nümayəndələri və media təmsilçiləri iştirak ediblər.
Ekologiya və Təbii Sərvətlər nazirinin müavini Novruz Quliyev jurnalistlərə bildirib ki, aksiyanın məqsədi qadağan edilmiş vasitələrlə balıq ovuna son qoymaq, davamlı olaraq su hövzələrinə buraxılan balıq körpələrinin mühafizəsini gücləndirməklə balıq ehtiyatlarının artırılmasına nail olmaq, cəmiyyətin bütün təbəqələrinin bu işə cəlb olunmasını təşkil etməkdir. Qadağan olunmuş vasitələrlə balıq ovlanması təbiətimizə qarşı vandal münasibətdir. Elektrik cərəyanları ilə, sintetik torlarla balıq ovlayanlar belə hərəkətlərdən çəkinməlidirlər, insanlar bu cür hallarla rastlaşarkən bu barədə nazirliyə və hüquq-mühafizə orqanlarına məlumat verməlidirlər.
Nazir müavini brakonyerliklə məşğul olanların kimlikləri barədə məlumatlı olduqlarını, onlar haqqında bu yaxınlarda cinayət işi qaldırılacağını bildirib: “Bununla belə, bu aksiyanı keçirməklə digərlərinə xəbərdarlıq edirik ki, bu işdən çəkinsinlər. Əgər bu, davam edərsə, onlar külli miqdarda cərimə olunacaqlar və hüquq mühafizə orqanları barələrində cinayət işi açacaq. Bu aksiya davamlı olacaq və bütün su tutarlarında davam etdiriləcək”. Nazir müavini əlavə edib ki, bu cür aksiyalar təkcə Bakıda deyil, digər regionlarda da keçirilir.
Aksiyada iştirak edən Həvəskar Balıqçılar İttifaqının sədri Əfqan Əliyev jurnalistlərə deyib: “Biz sivil balıq ovunun təbliğini dəstəkləyirik, qadağan olunmuş vasitələrlə balıq ovlanmasına qarşıyıq və hər zaman belə aksiyalarda iştirak edəcəyik. Əminik ki, bu birgə mübarizə nəticəsində tezliklə uğurlu nəticə əldə edəcəyik”.
Aksiyada iştirak edən həvəskar balıqçı Ramil Yağnəliyev qanunsuz balıq ovlayanları bu cür əməllərindən əl çəkməyə çağırıb: “Bu gün ərazidə gördüyümüz torlar istifadəsi qadağan olunan sintetik torlardır. Həmin torlar balıqların kütləvi şəkildə məhv olmasına gətirib çıxarır. Bu cür qanunsuz yollarla balıq ovlayanlara səslənərək demək istəyirəm ki, onlar da bizim kimi sivil yolla, qanunun icazə verdiyi qaydada ovla məşğul olsunlar. Biz təbiəti qorumalıyıq, gələcək nəsli də düşünməliyik”.