SİYASƏT
Şirin Nexamiya Mixaeli: Ürəyimiz Azərbaycanla – doğma Vətənimizlə bir döyünür
Bakı, 12 iyul, AZƏRTAC
Bu sözləri Azərbaycan Dağ Yəhudilərinin Əlaqələndirmə Mərkəzinin başçısı, Akko şəhərində Azərbaycan dağ yəhudiləri icmasının rəhbəri Şirin Nexamiya Mixaeli Yaponiyanın Azərbaycandakı səfirliyinin birinci katibi Ginqa Kobayaşi ilə görüşdə səsləndirib.
AZƏRTAC xəbər verir ki, görüş Bakı Beynəlxalq Multikulturalizm Mərkəzinin və həmin mərkəzin İsrail Dövlətindəki nümayəndəliyinin direktoru, beynəlxalq münasibətlər sahəsində ekspert Arye Qutun təşəbbüsü ilə iyulun 11-də İsrailin Akko şəhərində, Azərbaycan Dağ Yəhudilərinin Əlaqələndirmə Mərkəzində keçirilib.
Şirin Nexamiya Mixaeli yaponiyalı diplomatı mehribanlıqla qarşılayaraq, mərkəzin fəaliyyətindən, onun Bakı Beynəlxalq Multikulturalizm Mərkəzi ilə əməkdaşlığının və tərəfdaşlığının perspektivlərindən danışıb.
Ş.N.Mixaeli deyib: “Bu mərkəz Rusiya Yəhudi Konqresinin vitse-prezidenti, Dağ Yəhudilərinin “STMEQİ” Beynəlxalq Xeyriyyə Fondunun prezidenti German Zaxaryayevin və İsrailin Akko şəhərinin meri Şimon Lankri ilə səmərəli və sıx əməkdaşlığı nəticəsində ərsəyə gəlib. İsrail Dövlətində ən çoxsaylı Azərbaycan icmasının məhz mənim şəhərimdə - Akkoda yaşaması faktına görə böyük qürur hissi keçirirəm. Bir il əvvəl Akkonun meri ilə birlikdə gözəl bir ölkədə - Azərbaycanda olduq. Merimiz sadəcə bu ölkəyə, mehriban və səmimi Azərbaycan xalqına vuruldu. Azərbaycanda əmin oldum ki, burada heç vaxt antisemitizm olmayıb və yəhudilər heç vaxt özlərini əcnəbi kimi hiss etməyiblər. Əslən Azərbaycandan olan yəhudilər harada yaşayırlarsa-yaşasınlar, həmişə öz Vətəni Azərbaycanla fəxr ediblər, Azərbaycan dilini unutmurlar və ümumi ənənələri və dəyərləri qoruyub saxlayırlar. Lap qədim zamanlardan Azərbaycan torpağında islam və yəhudilik, atəşpərəstlik və xristianlıq mövcud olub. Bu torpaq bu gün də dünyaya inanılmaz tolerantlıq və dini dözümlülük səyləri nümayiş etdirir. Azərbaycanda multikulturalizm real həyat tərzidir”.
Yaponiya səfirliyinin birinci katibi G. Kobayaşi mehriban qonaqpərvərliyinə görə təşəkkür edərək bildirib ki, Akkoda, Azərbaycan evində özünü “Odlar Yurdu”nda olduğu kimi hiss edir.
Tolerantlığı və qonaqpərvərliyi ilə seçilən gözəl bir xalqın - Azərbaycan xalqının arasında anadan olmaq, böyümək və yaşamaq imkanı verdiyinə görə Tanrıya minnətdar olduğunu bildirən Ş.N.Mixaeli deyib: “Biz fəxr edirik ki, Azərbaycanda – bizim üçün Ana Vətənə çevrilən bu bərəkətli torpaqda anadan olmuşuq. Biz tam məsuliyyət hissi ilə bütün dünyaya, ən başlıcası erməni işğalçılarına bəyan edirik ki, Ermənistan-Azərbaycan, Dağlıq Qarabağ münaqişəsi həm də bizim faciəmiz, bizim ağrı-acımızdır, çünki həqiqət Azərbaycanın tərəfindədir. İşğalçılara qarşı aparılan bu dəhşətli müharibədə yəhudilər və azərbaycanlılar yanaşı olublar: biz yanaşı yaşamışıq, bir yerdə sevinmişik, bir yerdə kədərlənmişik, çiyin-çiyinə döyüşmüşük. Biz - dağ yəhudiləri uzun illər böyük və müdrik Azərbaycan xalqının torpağında yaşadığımız üçün bilavasitə bilirik və başa düşürük ki, bu torpaqlar əzəli Azərbaycan əraziləridir və Dağlıq Qarabağ Azərbaycan xalqı üçün nə deməkdir. Dağlıq Qarabağ Azərbaycanın ürəyi, bu xalqın mədəniyyət beşiyidir.
Biz - əslən Azərbaycandan olan dağ yəhudiləri belə bir faktı qürur hissi ilə vurğulayırıq ki, daşnak işğalçılarına qarşı bu müharibədə müstəqil Azərbaycanın ilk milli qəhrəmanlarından biri qardaşımız Albert Aqarunov olub. O, Azərbaycan və yəhudi xalqlarının mərdliyinin rəmzinə çevrilib. Azərbaycanın ərazi bütövlüyü uğrunda döyüşənlər arasında Albert Aqarunov ilə yanaşı, çoxlu yəhudi olub, itkin düşənlər var. Onlardan biri Göyçaydan olan yaxın qohumum Vüqar Mikayılovdur. O, bu günə qədər erməni əsirliyindədir. Hazırda böyük Mikayılovlar ailəsi İsrailin müxtəlif şəhərlərinə səpələnib. Anası, böyük qardaşı və bacısı erməni əsirliyində 22 illik girovluqdan sonra Vüqarı tapacaqlarına böyük ümid bəsləyir və səbirsizliklə onun yolunu gözləyirlər.
Bu mürəkkəb vəziyyətdə mən Azərbaycan dağ yəhudiləri icmasının başçısı kimi qeyd etmək istəyirəm ki, əgər bizə - Azərbaycanın oğullarına ehtiyac yaransa, İsraildə könüllülər batalyonu toplayıb, işğal olunmuş əraziləri azad etməkdə Azərbaycan xalqına kömək etməyə hazırıq. Çox ümid bəsləyirəm ki, əzəli Azərbaycan əraziləri tezliklə azad ediləcək və azərbaycanlı qaçqınlar doğma yurd-yuvalarına qayıdacaqlar. Biz qələbəni Şuşada bayram edəcəyik və zəfər bayrağını bu şəhər üzərində dalğalandıracağıq”.
Yaponiyanın Azərbaycandakı səfirliyinin birinci katibi Ginqa Kobayaşi yəhudilərin Azərbaycan ilə mənəvi əlaqəsini yüksək qiymətləndirərək deyib: “Tolerantlıq və multikulturalizm Azərbaycan cəmiyyətinin əsaslarından biridir. Azərbaycan bir çox dinlərin və xalqların nümayəndələrinin vətənidir Akkoda - Azərbaycan Dağ Yəhudilərinin Əlaqələndirmə Mərkəzində bir daha əmin oldum ki, yəhudi və Azərbaycan xalqlarını qardaşlıq, dostluq və tərəfdaşlıq telləri bağlayır”.
Multikulturalizmin və tolerantlığın həqiqətən Azərbaycan xalqının həyat tərzi olduğunu vurğulayan Ş.N.Mixaeli deyib: “Akko şəhərinin meri Şimon Lankri Azərbaycan adlı ölkəni məhz əslən Azərbaycandan olan yəhudilər və mənim şəxsi dostum, İsrailin “Cəmiyyət üçün beynəlxalq layihələr” qeyri-hökumət təşkilatının başçısı Arye Qutun sayəsində tanıdı. Biz həmişə İsraildə fəxrlə danışırıq ki, Azərbaycanda heç vaxt antisemitizm olmayıb. Azərbaycana səfər edən, onun rəhbərliyinin yəhudilərə mehriban münasibətini əyani görən Şimon Lankri elə oradaca Dağ Yəhudilərinin “STMEQİ” Beynəlxalq Xeyriyyə Fondunun prezidenti German Zaxaryayevlə birlikdə qərara aldı ki, Akkoda Heydər Əliyev adına Azərbaycan Evinin inşasına ehtiyac var. Mən fəxr edirəm ki, Akko şəhərinin merini Azərbaycanın həqiqi dostluna çevirə bildik. İsrail Dövləti, Akko şəhərinin meriyası və Akkonun Azərbaycan dağ yəhudiləri icması bu gün Azərbaycan və Azərbaycan xalqı ilə bir yerdədir. Ürəyimiz Azərbaycanla – doğma Vətənimizlə bir döyünür”.