REGİONLAR
Şirvanda aşağı seçki komissiyalarının üzvləri seçki hərəkətləri barədə məlumatlandırılır
Şirvan, 27 yanvar, Mahir Babayev, AZƏRTAC
Fevralın 9-da Azərbaycan Respublikasında Milli Məclisə seçkilərə hazırlıqla bağlı respublikamızın hər yerində olduğu kimi, 46 saylı Şirvan şəhərə seçki dairəsində də aşağı seçki komissiyaları üçün keçirilən maarifləndirici treninqlərə start verilib.
AZƏRTAC-ın bölgə müxbiri xəbər verir ki, yanvarın 27-də günün birinci və ikinci yarısında keçirilən treninqdə 12 məntəqə seçki komissiyasının 60 üzvü iştirak edib.
Treninqlərdə məntəqə seçki komissiyalarının üzvlərinə seçki günü məntəqə seçki komissiyaları üzvlərinin rol və vəzifələri, seçki günü prosesləri və müstəsna hallar, səslərin hesablanmasına hazırlıq, seçki bülletenlərinin təsnifatı, səslərin hesablanması və yekun protokolun doldurulması, səsvermə proseslərinə dair praktiki tapşırıqlar və digər proseduralar barədə geniş məlumat verilir. Həmçinin məşğələlərdə müxtəlif mövzular ətrafında müzakirələr aparılır, komissiya üzvlərini maraqlandıran suallar cavablandırılır.
Aşağı seçki komissiyaları üzvlərinin bilik, bacarıq və səriştələrinin artırılması istiqamətində aparılan maarifləndirmə işinin əhəmiyyətindən danışan 46 saylı DSK sədri Taleh Ağayev bildirib ki, üç gün davam edəcək treninqlərdə dairənin 34 məntəqəsindən 204 nəfər iştirak edəcək.
Aşağı seçki komissiyası üzvlərinə MSK tərəfindən “Seçki günü üçün yaddaş” kitabçası, səsvermənin nəticələri haqqında protokolun verilməsi və digər zəruri nümunələr təqdim edilib.
Qeyd edək ki, yanvarın 27-də 58 saylı Hacıqabul-Kürdəmir, 59 saylı Salyan, 60 saylı Salyan-Neftçala, 61 saylı Neftçala, 62 saylı Saatlı, 63 saylı Sabirabad I, 64 saylı Sabirabad II, 65 saylı Saatlı-Sabirabad-Kürdəmir, 66 saylı Biləsuvar, 79 saylı İmişli, 80 saylı İmişli-Beyləqan,120 saylı Cəbrayıl-Qubadlı seçki dairəsi, dairə seçki komissiyalarında da aşağı seçki komissiyalarının üzvləri üçün treninqlər keçirilib.