SİYASƏT
Siyasi ekspert: Həmsədr ölkələrin diplomatları Şuşaya getməməklə Minsk qrupunu daha disfunksional edirlər
Bakı, 11 iyul, AZƏRTAC
Prezident, Müzəffər Ali Baş Komandan İlham Əliyevin rəhbərliyi ilə rəşadətli Ordumuz öz gücü sayəsində Azərbaycanın 30 ilə yaxın işğal altında qalan ərazilərini geri qaytardı. Azərbaycan 44 günlük Vətən müharibəsində tarixi Qələbə qazandı. Lakin ölkəmiz bununla kifayətlənmək niyyətində deyil. Erməni diasporunun, onlara havadarlıq edən ölkələrin və siyasətçilərin təsiri altında yazılmış məqalələrdə Azərbaycana qarşı qərəzli və təhrif olunmuş informasiyalar yer alırdı. Bu cür addımlar müharibədən ötən 8 ay ərzində də davam etməkdədir. Dünyaya bu məlumatların dezinformasiya olduğunu sübut etmək, əsl həqiqəti göstərmək, beynəlxalq ictimaiyyəti erməni vəhşiliyi barədə məlumatlandırmaq məqsədilə Prezident İlham Əliyevin tapşırığına uyğun olaraq, Azərbaycandakı diplomatik korpusun və beynəlxalq təşkilatların nümayəndələrinin işğaldan azad edilmiş ərazilərimizə səfərləri təşkil olunub.
Bunu AZƏRTAC-a açıqlamasında siyasi ekspert Elşən Məcidov bildirib.
Siyasi ekspert qeyd edib ki, Şuşaya səfər edənlər arasında Xorvatiya, Bolqarıstan, İtaliya, Latviya, Macarıstan, Niderland, Polşa, Yunanıstan, Türkiyə, Belçika, Estoniya, Litva, eyni zamanda, NATO və Avropa İttifaqına üzv ölkələrin nümayəndələri ilə yanaşı, Kollektiv Təhlükəsizlik Müqaviləsi Təşkilatının üzvləri olan Belarus, Qazaxıstan və Tacikistan kimi ölkələrin diplomatları da var idi. Səfərdə müxtəlif ölkələrin təmsilçilərinin iştirak etməsi dünya ölkələrinin erməni vandalizminin əyani şahidi olması baxımından da əhəmiyyətli idi.
“Diplomatlar bir daha şahidi oldular ki, bu torpaqların əsl sahibləri kimlərdir. Onlar gördülər ki, əgər ermənilər həqiqətən bu əraziləri öz vətənləri hesab etsəydilər, 30 il ərzində dağıdıcı fəaliyyətlə yox, quruculuqla məşğul olardılar. Azad edilmiş ərazilərdə törədilən vandallıq aktlarının izləri bu ərazilərin heç vaxt ermənilərə aid olmamasının sübutlarından biridir. Əksinə, Azərbaycanın Vətən müharibəsindən keçən qısa müddət ərzində bərpa işlərinə başlaması bu ərazilərin tarixən ona məxsus olduğunu nümayiş etdirir. Ermənistanın işğal illərində ərazilərimizi minaladığı halda, Azərbaycan torpaqlarını azad etdikdən qısa müddət sonra “ağıllı şəhər” və “ağıllı kənd” layihələrini reallaşdırır, ekoloji təmiz enerjinin əldə edilməsi istiqamətində geniş fəaliyyət göstərir. Nəticə etibarilə erməni vandalizminə qarşı Azərbaycanın bərpa işləri həyata keçirməsi xarici diplomatlar üçün Qarabağın həqiqətən kimə məxsus olmasını tam aydınlaşdırır”, - deyə ekspert bildirib.
“Bütün bu məqamlarla yanaşı, təəssüf doğuran fakt Rusiya, ABŞ və Fransa diplomatlarının azad olunmuş ərazilərə səfərdə iştirak etməməsidir. Hər üç ölkənin ATƏT-in Minsk qrupunun həmsədri olduğundan, əslində, azad edilmiş ərazilərə ilk olaraq məhz Fransa, ABŞ və Rusiya diplomatları getməli idilər. Çünki Minsk qrupu Ermənistanla Azərbaycan arasında münaqişənin tənzimlənməsinə və uzunmüddətli sülhün bərqərar olmasına töhfə vermək üçün yaradılmışdı. Bu ölkələrin diplomatlarının regiona səfər etməsi onların reallıqların, Azərbaycan ərazilərində törədilən dağıntıların ən azından ilkin monitorinqinin aparılması baxımından önəmli olardı. Şuşaya səfər, həmçinin iki xalq arasında barışığın hansı yolla əldə edilməsini müəyyənləşdirmək prizmasından da aktual idi. Həmsədr ölkələrin diplomatlarının regiona səfərdən məqsədli şəkildə imtina etməsi onların həmsədr kimi funksiyalarına etinasız yanaşmalarının göstəricisidir. Artıq keçmişdə qalmış Dağlıq Qarabağ münaqişəsini bu addımları ilə yenidən aktuallaşdırmağa çalışan həmsədrlər düşünmürlər ki, bununla onlar Minsk qrupunu daha disfunksional edirlər”, - deyə Elşən Məcidov vurğulayıb.